Diabierna atardi Girigoria Croes di Kas Ariba a bay na All To Car pa ricibi oficialmente su premio como ganado di e rifa di auto di Lions. El a conta cu ta un amiga a conseh’e pa cumpra un rifa di Lions. Ora el a pasa band’i rotonde di Tanki Leendert a topa nan y a cumpra un. Su auto ta di aña 2001 y e mes ta bisa cu su tempo a yega. Awo ta contento di haya un nobo. Croes a conta cu net e tabata buscando un di segunda mano pa cumpra. “Mi ta gusta yuda. Mi ta cumpra djis pa mi yuda. Esaki ta prome biaha cu mi a gana algo.”
Kenneth Wever, director di All To Car a mustra di ta satisfecho pa por a contribui cu Aruba Lions Club y nan rifa. A duna tur premio su descuento substancial pasobra a gusta e idea nobo aki di kier rifa tur cos electrico. All To Car a caba di ricibi un carga nobo di auto electrico. Tambe ta brinda e servicio di instalacion necesario na cas. E compania ta habri pa peticionnan similar y ta evalua nan individualmente.
Rubin Ponson, president di Aruba Lions Club a indica cu e rifa tabata exitoso pasobra ta algo diferente. “A bay den full otro direccion danki na e ayudo enorme di All To Car. For di un auto di mucha, step, bicicleta, scooter y un auto,” Ponson a bisa. A splica tambe cu no ta rifa un cas mas, manera tabata e tradicion, pa motibo cu construccion di cas a bira demasiado costoso y no ta rende suficiente fondo pa yuda comunidad.
Ponson: “Tur ganado ta sumamente contento cu nan premio. Cada ciudadano cu a logra cumpra un rifa ta un premio pa Lions paso a yuda contribui na comunidad. Ta fondonan cu ta bay bek pa un persona den necesidad.”
Adicionalmente, e president di e club a comparti cu tin varios proyecto andando, hospital bed and wheelchair, smilemobile na cas di hende grandi pa drecha nan dentadura, programa di control medico, y otro actividad cu ta drecha luga ademas di donacionnan financiero.
