Diasabra mainta a drenta e noticia tristo cu Charise Arends a fayece, un personahe bon conoci den e mundo di gaita. For di aña 2002 caba e tabatin su ups and downs cu su salud, pero el a lucha hopi y a gana varios bataya pero diasabra dia 3 di Augustus Papa Dios a manda yam’e pa 11:12am. El a fayece di Calciphylaxis na Hospital aki na Aruba mes. Charise ta traha na Serlimar, no tabata casa y no tabatin yui, pero si hopi yuinan sin dolor cu a stim’e hopi. Lo anuncia acto di entiero despues.
Charise Arends a drenta e mundo di canto den coro di Juffrouw Lila. Despues el a cuminsa su carera gaitera den Grupo Amistad di Isidro Maduro. Na aña 1995 el a drenta Banda La Paranda como cuartista, pero ora a nota su potencial den canto, a dicidi di pone den front line y a compone su prome cantica “Paranda Allí”
riba e prome CD di BLP na aña 1996. Di eynan e tabata encarga cu e parti vocal di BLP y a bira e Assistant Manager.
Charise Arends a sigui crece den e mundo ey componiendo y cantando diferente canticanan manera Ban Uni Hunto-Ambiente di Pasco-Jugo de Limón-Mama Bertha-Bin Goza-E Wega-Ban Canta é-Ata Banda la Paranda y Juan. Na aña 2002 Charise a cuminsa sinti malo y e mes a compone e cancion “Mi Señor” canta pa Naika Henriquez.
Den comienso di aña 2003 el a bay Hulanda pa su salud y Dokternan a detecta cu e tabatin Lupus. Ey su lucha a cuminsa, pasobra Dokternan a dun’e apenas un par di dia mas di bida. Charise nunca a give-up el a lucha pa varios luna largo, su Fé tabata asina grandi cu el a vence e enfermedad y a bolbe Aruba.
Como gradicimento na Dios, Banda la Paranda a titula e CD di aña 2003 “Danki Señor”. Eyriba Charise a canta “Milager di Amor”, “Danki Señor” y Mi Tamborero. Na 2004 BLP a celebra 10 aña y a graba nan Dobbel CD, riba cual Charise a canta “Wowo ta pa mira” y “Mi soño di tumba”.
Na aña 2007 BLP a tuma un pausa y Charise a lanta su propio grupo di Gaita “Nos cu Nos”. Asina mes Banda la Paranda a sali na 2010 y 2016. Tambe Charise a forma parti di Gaita Rumbera y Tradicion di Gaita.
