Tin un proceso na momento cu e famianan den necesidad tin cu cana, prome cu nan haya nan pakete. Gabriel Marchena, trahado social di Fundacion Pa Nos Comunidad, ta splica cu na momento cu e cliente ta referi na e fundacion door di un di e otro instancianan cu nan ta traha cun’e, e fundacion ta haci un intake gesprek.
Tin un formulario cu e trahadonan social ta haci pregunta na e clientenan pa haya sa informacionnan adicional. Den caso cu constata en berdad cu e situacion ta di tal manera cu e cliente ta splica, ta haci un bishita na cas tambe.
Ta haci un cita cu e cliente pa por sinta hunto y pa tende e otro banda di e storia, cual na oficina no ta scucha.
Hopi biaha un cliente ta sinti su mes mas comodo den su mesun cas pa conta mas di e situacion.
Kico a topa cun’e riba veld
Marchena ta sigui conta cu cada caso ta diferente. Hopi cliente, no tur ora tin un netwerk asina amplio cu un famia por yud’e tambe. E relacion di famia no ta bon por ehempel. Tin ora ta haya cu situacion di mama soltera, tata soltero, cu ta pone cu hopi biaha nan tin cu para riba nan pia y busca manera pa yuda nan mesun famia.
E muchanan hopi biaha ta sufri di e scogencia di e mayornan. Hopi biaha nan ta esun cu nan ta den e situacion tambe sin cu nan kier.
Situacionnan deplorabel
Situacionnan deplorabel tambe nan ta haya. Ta haya casnan cu no tin awa, no tin coriente. Tin cas cu por ehempel no tin frigidaire, no tin stof. Articulonan basico tambe cu normalmente un hende mester pa por sobrevivi cun’e.
Tin ora hasta un cama un cliente no tin, no tin sofa cu ta cosnan toch necesario pa un hende tin comodidad den su mesun cas.
Den e casonan aki e fundacion ta yuda. Semper ta stem af cu e otro instancianan tambe wak den ki parti di plan di guia caba nan a yuda e cliente. En todo caso ta mira cierto parti cu no a wordo yuda, e ora ta brinda ayudo.
Por ehempel semper a haya donacion di articulonan di cas manera muebles, e cama, e sofa. Por pensa riba e stof y frigidaire cual e fundacion por yuda e clientenan cu haci un peticion pa esey ta yuda nan den esaki.
Tardansa di e clientenan
Ta yega un momento cu ta hala e orguyo un banda y tambe e parti di berguensa, ora cu ripara cu no tin un salida pa yuda cu e situacion ta sali e ora ey bati na porta di e instancia. Tin hopi districto cu hopi cliente ta reconoci cu e ayudo social di e fundacion.
Tin tambe cu ainda no ta conoci, pasobra nan no a bati na porta na otro instancia cu e fundacion ta traha cun’e, te pa yega cerca nan. Ta bezig ta cambiando poco poco mas den e bario cu hendenan ta durf di pidi ayudo ta bezig ta haciendo esaki mas, debi tambe cu un ta informa otro y e parti tambe cu ta wak informacion, hopi biaha falta di un organisacion cu clientenan no ta haya.
Esey tambe ta pone cu nan no sa precies e caminda pa cana pa haya ayudo.
Tur bario
Den tur districto tin necesidad sigur. Naturalmente tin un grupo mas grandi cu otro. Ta ripara cu den tur districto di Aruba tin necesidad. Tin famia cu ta biba den situacionnan financiero cu ta hopi fastioso cu mucha tambe ta envolvi den esey.
Hopi biaha nan no ta ni durf puntra pa ayudo, te pa bay na instancianan. E berguensa ta hunga un rol, e orguyo tambe. Hopi biaha e falta di conocemento di un ke otro servicionan cu e instancianan ta brinda.
Duracion di tuma decision
E decision no ta dura mucho largo. Si haya peticion of nan mes constata cu e situacion di tal manera cu mester ayudo urgente, ta actua di biaha. Tambe semper ta follow up cu un ke otro instancianan cu nan ta traha cune.
E idea ta pa monitor e situacion di e cliente un tiki pa por yud’e mas miho cu por.
Vooral ora cu mira hopi biaha un cliente ta den un trayecto largo di e sistema, ta purba di busca un manera pa lag’e mehora su situacion financiero.
Idea ta cu e fundacion ta brinda e trayecto di participacion cu una bes cu e cliente ta purba di yuda den un manera cu ta yuda stabilisa su situacion financiero.
Den caso cu wak den un temporada cu no tin trabao, ta purba di hink’e den un trabao boluntario, pa stimula e cliente pa haya e habilidadnan cu e tin mester pa e por solicita pa un trabao y una bes subi mercado laboral, e por funciona den esaki. Naturalmente e por provee p’e y su famia.
Entrega di material
Marchena a splica cu normalmente pa loke ta e pakete di cuminda, e cliente ta bin busk’e na e fundacion. Nan ta haya contacto via e trahadonan social ora nan tin cu bin busca e pakete. Den e parti di donacion semper ta palabra cu nan, caminda tin boluntario cu ta bin entrega articulonan pa donacion.
