Gabinete Wever-Croes tin un problema cu Hulanda of cu su Parlamento?

56

Diabierna awor conseho di Minister di Reino lo dicidi riba e forma cu lo atende cu supervision financiero na Aruba despues cu Parlamento di Aruba a kita tur autoridad di Reino pa coregi e maneho financiero di Gobierno di Aruba. Secretario di Estado, Raymond Knops den un discurso na un evento organisa pa Genootschap Nederland-Aruba a laga sa cu Gobierno di Aruba tin cu mantene su mes na palabracionnan haci den e protocol di cooperacion Hulanda-Aruba cu a wordo palabra entre e Gobiernonan di Reino dia 22 di november 2018.

Den e protocol aki Gabinete Wever-Croes a palabra den e di III parti, “wijziging LAFT en toezicht door het College Aruba Financieel toezicht” cu 1) CAFT lo keda funciona na Aruba pa por lo menos 3 aña mas, cu 2) E ley pa sigura esaki lo wordo entrega na Parlamento mas tarda dia 31 di december 2018 cu e unico proposito pa cambia e normanan fiha den e protocol, y cu 3) E ley lo drenta na vigor pa mas tarda dia 1 di januari 2019, pero no sin un acuerdo prome riba e contenido di e ley cu Conseho di Minister di Reino.

Manera ta conoci, Parlamento di Aruba den su mayoria, lidera pa lider di fraccion di MEP, Rocco Tjon, a cambia e indole di e ley di tal forma cu Conseho di Minister di Reino no tin un rol mas den e supervicion financiero di Aruba, manera e ley anterior tabata regla. E pregunta cu por haci sinembargo ta, si Gabinete Wever-Croes awor tin un problema cu Gobierno di Reino Hulandes of cu su mesun Parlamento?

Ta obvio for di e protocol cu Gabinete Wever Croes tabata na altura y tabatin tur intencion pa cumpli cu e palabracionnan haci, pero cu e fraccion di MEP a protesta den forma di un amienda extenso. Kico lo sosode awor si Gobierno di Reino bin cu un Algemene Maatregel van Rijksbestuur pa regla e supervicion financiero cu Gabinete Wever Croes a palabra y cu Gabinete Mike Eman a cuminsa na 2015?

Den practica di tur dia, e supervision financiero y e instrumentonan cu tabata existi den LAFT lo ta similar, sinembargo sin aprobacion di Parlamento di Aruba. Gabinete Wever Croes dificilmente lo por protesta cu Conseho di Minister di Reino ta tuma paso pa sigura cu palabracionnan haci ta wordo efectua. E problema lo ta e ora entre Gabinete Wever Croes y su Parlamento – y lo ta interesante pa sa con e lider di fraccion, Rocco Tjon y Adi Thijsen, kendenan a lidera e cambionan den LAFT, lo reacciona.