Minister di Finansa y Cultura, mr. Xiomara Maduro a anuncia cu finansa publico ta den recuperacion, pero asina mes tin cu reforma pa garantisa un maneho duradero y stabiel. Por lo tanto, lo reforma e sistema di impuesto door di aumenta BBO, den un esfuerso pa logra mas entrada pa gobierno. Pero, ta haci esey hunto cu varios compensacion, pa evita inflacion.
E mandatario a sigui splica cu compensacion ta importante. Compensacion individual, pero tambe p’e negoshinan. Den esaki tambe a tene miho cuenta cu e reparticion di entrada cu pais Aruba ta haya for di turismo. Ta papia aki di un reparticion mas husto. Mas cu claro, e mehoracion di locual ta e cumplimento cu impuesto p’e ciudadano, pero tambe p’esunnan cu ta bishita nos.
Recuperacion di e finansa publico di Aruba, por medio di compensacion, reparticion husto y mehoracion di cumplimento di impuesto door di tur ciudadano y bishitante. Esaki t’e puntonan cu e plan di impuesto ta dirigi riba dje. Comensacion den forma di reduccion di impuesto riba entrada y riba salario. Na tur gobierno lo haya 14 miyon menos. Pensionadonan di SVb lo haya reparatietoeslag di 45 florin cu ta suma 13 miyon florin pa aña. Pues, no ta cobransa extra so lo tin, sino lo recompensa esunnan mas debil den comunidad.
Lo introduci un tarifa nobo di BBO cu ta resulta den un tarifa combina di BBO, BAVP y BAZV di 7%, hunto cu esaki ta introduci un pakete di compensacion pa mitiga inflacion. Tambe lo tin un reparticion husto di entrada y aumento di cumplimento di impuesto (compliance).
Manera ya indica, e tarifa nobo ta di 7%. BBO ta subi cu 1%. E tarifa di BBO ta bira 2.5% na comienso di januari otro aña. BAVP ta keda 1.5% y BAZV ta keda 3%. Hunto e lo bira un total di 7%.
Gabinete Oduber (MEP so den Gobierno), por medio di Minister Nilo Swaen a introduci BBO na Aruba desde 1 di januari 2007, mara na 3%. Den eleccion 2009, partido AVP a gana eleccion, entre otro, cu e lema di lo elimina BBO asina nan asumi gobernacion. Ora a tuma poder di e pais, no a elimin’e, sino a bah’e na 1,5% pero no a dura mucho cu mester a adapt’e, a bin cu BAZV y consecuentemente a hacie 3,5%. Ora MEP a bolbe asumi poder na aña 2017 den coalicion MEP-POR-RED, a bin haya e BBO na 3,5% y a bin cu un crisisheffing y a yam’e BAVP di 1,5% y a adapta e otro impuestonan pa hunto e suma 6% atrobe. Awor, pa otro aña, Gabinete Wever-Croes II (MEP-Raiz) a anuncia aumento di BBO di 1,5 pa 2,5% pa hunto cu BAVP y BAZV e bira 7%. Esaki ta e totalidad di BBO di mas halto den historia di Aruba!
Cu e impuesto aki, Gabinete Wever-Croes II ta spera di por saca 500 miyon florin di belasting for di economia. Awor cu 6% na BBO-BAVP-BAZV ta produci 430 miyon den caha di pais Aruba. E aumento di 1% lo trece mas o menos 70 miyon adicional riba cuenta di Departamento di Impuesto (DIMP) den aña 2023.
Minister Xiomara Maduro ta sigur cu e ora ey por atende cu locual ta e conseho cu, entre otro CAft ta keda insisti riba dje, pa locual ta aumento di entrada di belasting na Aruba. Di otro banda gobierno a indica cu tanto den presupuesto 2022, pero tambe den 2023, a cuminsa corta gasto di operacion.
Ta bon pa indica cu e plan di impuesto 2023 ta acopla tambe na e cuadro financiero presenta den presupuesto 2023.
