Resientemente Minister di Enseñansa, Siensia, Kultura i Deporte, sra. Marilyn Alcalá-Wallé a firma un akuerdo relashoná ku edukashon físiko, ku sr. Remko Bicentini, fundador di Fundashon Bicentini.
Segun e akuerdo di gobernashon 2017-2021, e maneho di gobièrnu ta dirigí riba e.o: garantisá edukashon físiko den skolnan i den barionan, krea infrastruktura i akomodashonnan di deporte i promové turismo di deporte.
Den kuadro di esaki, gobièrnu a hasi un tremendo invershon den e akuerdo ku Fundashon Bicentini.
Punto di salida di e akuerdo ta pa trese edukashon físiko bèk den skolnan i barionan, tambe sòru pa materialnan di deporte.
Pa medio di e akuerdo aki Kòrsou ta risibí materialnan di deporte for di Hulanda ku koperashon di Fundashon Bicentini. Alabes Fundashon Bicentini tambe ta proveé materialnan di skol e.o: lèsenar, stul etc.
Sr. Remko Bicentini a duna di konosé ku e ta hopi satisfecho ku e kolaborashon fruktífero entre sektor gubernamental i no-gubernamnetal. Di e forma aki ta brinda nos komunidat e materialnan di skol i deporte nesesario pa asina sigui promové, stimulá deporte i enseñansa bou di hóbennan den nos pais.
FDDK ku Fundashon Bicentini awor ta bai inventarisá den skolnan i barionan kaminda tin gran nesesidat di material di skol i deporte. Huntu ta tuma e akshonnan nesesario pa asina brinda nos hóbennan un formashon, salú físiko i mental sano.
