Gabinete AVP – FUTURO ta sigui cu Royal Schiphol Group

Cu yen di palabra bunita di e ministernan presente y e representante di Royal Schiphol Group, a tuma luga firmamento di un MoU entre Gobierno di Aruba y Royal Schiphol Group (RSG) “na beneficio di Aruba y su economia”, segun e Minister di Turismo, Labor y Transporte, mr. Wendrick Cicilia. Den curso di diabierna lo sinti cu e Interim Management Team di Aruba Airport Authority (AAA) riba kico ta e palabracion. AVP y FUTURO tin un otro pensamento cu e gobierno saliente di MEP-Raiz riba e tema aki.

Prome Minister mr. Mike Eman a splica cu e MoU aki ta simplemente habri e porta pa por sigui negocia riba e terminonan di loke mester bira un acuerdo di maneho cu RSG. E tabatin masha elogio pa e instituto aki mescos cu KLM cu e ta considera di ta sinonimo di exito den Reino Hulandes y mundialmente.

E decision aki ta loke ta pensamento di e accionista di Aruba Aiport Authority pero e discusion riba e acuerdo, kico tur e ta bay contene, ta den man di e directiva cu lo sinta cu e grupo. Semper teniendo na cuenta e maneho strategico cu Gabinete AVP – FUTURO kier hiba. Conocemento tabata e principal motibo pakico a scoge pa sigui combersa cu e grupo aki cu tin masha hopi aña manehando aeropuerto di Aruba. E ta importante pa ora cu ta subi mercado pa haci fiansa, tin un nomber importante manera RSG ta duna ayudo na aeropuerto.  E branding ta hunga un rol importante, mas pasobra kier sigui crece.

Loke cu a bini dilanti tambe ta cu te ainda no tin un profesional local cu ta cla  pa maneha e operacion, aunke cu esaki a palabra for di momento cu a firma un acuerdo na aña 2004. RSG ta bisa cu niun Rubiano ta capacita pa maneha nos aeropuerto pero ta lubida di bisa cu e ultimo aña aki, cu RSG a lanta bela bay laga nos aeropuerto atras sin un director, ta tres Rubiano a maneh’e. No solamente a wanta e operacion sino tambe cu a logra kibra tur record di crecemento den historia di AAA.

Nos mester Royal Schiphol Group?

Opinion ta mixto riba e tema aki. Tin hende ta sinti cu nos no mester di nan mas, pasobra e compania ta financieramente stabiel, nos relacion cu e aerolineanan ta bon y e demanda pa Aruba ta keda halto. Ta cuestiona tambe si mester sigui paga un compania Hulandes asina siendo nos mes tin profesional cu por haci e trabou. Pero, di otro banda tin hende ta teme cu si gobierno tum’e bek, cu lo conoce metemento atrobe di politica den operacion di e compania. Tambe, actualmente por conta riba experticio di Royal Schiphol Group riba varios tereno, manera e construccion. E financiamento tambe a bay facil y ta medio condiciona cu Royal Schiphol Group ta sigui opera e compania. Ta pensa cu si saca nan afo, cu e “lendernan” por bira nervioso y cuminsa haci fastioso.

Negosacion pisa cu e gobierno anterior

E tono di negosacion no tabata bayendo facil. Royal Schiphol Group ta haciendo varios demanda cu no necesariamente Gobierno di Aruba ta dispuesto pa acepta. Asina por ehempel nan no ta cumpliendo, despues di 20 aña di relacion, pa pone un yiu di tera como director di e compania. Cada biaha ta sigui trece stranhero pa maneha e compania pa nos. Y den e contract ta stipula cu nan mester entrena un hende pa asumi e funcion. Den pasado a manda ehecutivonan Schiphol na Hulanda pa sigui entrenamiento pero na final no a cumpli cu nombra un di nan como director. Ta bin acerca cu Royal Schiphol Group kier redobla e suma cu ta cobra Aruba pa su trabou. Di 2.5 miyon kier subi te na 5 miyon pa aña. E motibo ta cu na e otro aeropuertonan cu nan ta maneha, esey ta e tarifa cu nan ta cobra. Tambe nan a bolbe trece padilanti cu nan ta interesa pa haya un stoel den Hunta di Supervision di e compania. Nan tin algun aña pidiendo esey pero nunca Gobierno di Aruba, di varios asignatura, no a acepta.

Aeropuerto ganando placa

Na aña 2023, Aruba Airport Authority tabatin un entrada total di Afl. 182.876.032,=, cu ta traduci den 18% mas compara cu aña 2022, ora cu nan entrada a alcansa Afl. 154.760.107,=. Despues di kita gasto, Aeropuerto a keda cu Afl. 44.507.303,= na ganashi. Poco entidad di Gobierno di Aruba tin e ganashu aki anualmente. Aña pasa nan a paga dividendo di aña 2022, cu a resulta den un bunita transferencia di 12.6 miyon florin. E dividendo pa aña 2023 lo tabata casi mesun cos. Ta bon pa bisa cu anualmente Aruba Airport Authority ta paga 12 miyon florin na belasting riba ganashi, banda di tur otro impuesto cu nan ta paga, por ehempel na e “concession fee”.

Royal Schiphol Group ta cobra na ordo

E relacion entre Royal Schiphol Group y Gobierno di Aruba tin su costo. Aña pasa a paga nan mas o menos 6.7 miyon florin, cu ta inclui nan consehonan, salario di e director y tur otro beneficio p’e. Si pone den perspectiva, anto por deduci cu Royal Schiphol Group ta cobra mita di e dividendo completo di Gobierno di Aruba, cu ta 100% doño di e compania.

Aeropuerto lorando bon

Aña 2023 Aeropuerto Internacional Reina Beatrix a cera cu 238 empleado. A maneha un total di 2.888.695 pasahero cu ta basta mas cu aña 2022, ora a atende 2.570.108 pasahero. Na tur nan ta atende 26 diferente aerolinea cu ta conecta nos cu 32 ciudad y cu 30 vuelo non-stop.  

Aruba y Schiphol Group

E relacion di trabou entre Aruba Airport Authority N.V. y Royal Schiphol Group a cuminsa desde april 2004, bou maneho di Minister di Turismo, ing. Eddie Briesen. E tempo ey a bisa cu lo tabata pa un tempo corto, pero tanto gobiernonan di AVP y MEP a sigui renoba e contract cu e compania Hulandes.

Schiphol Group kier crece den region

Un di e discusionnan riba mesa awo entre Gobierno di Aruba y Schiphol Group ta cu nan lo ta interesa pa tuma e aeropuerto di Sint Maarten, Boneiro y Corsou over, siendo cu den e contract cu Gobierno di Aruba ta stipula cu nan no por maneha ningun aeropuerto den nos region cu por forma un competencia pa nos isla. Ya caba nan a tuma e aeropuerto di Sint Maarten caba pa maneha e proceso di reconstruccion y pa desaroya un organisacion profesional, hunto cu un bon structura di negoshi. Y esaki, aunke nan ta isla ruman…nan ta un competencia pa nos y Aruba lo no por keda cu su mannan crusa pa mira con Schiphol Group ta move pasaheronan di Aruba pa comparti cu e otro islanan!

Tocante Royal Schiphol Group

Royal Schiphol Group ta estableci na Hulanda na aña 1916 cu su oficina principal den Amsterdam Airport Schiphol. Na october 2008 e directiva di Aéroports de Paris y Schiphol Group a acorda pa tuma 8% di e accionnan di cada compania y asina a bira e grupo di maneho di aeropuerto di mas grandi na mundo.

Schiphol Group ta 100% doño di Amsterdam Airport Schiphol, Rotterdam The Hague Airport y Lelystad Airport. E ta doño tambe di 51% di Eindhoven Airport y 19% di Brisbane Airport. Separa di Aeropuerti Internacional Reina Beatrix, e mesun Schiphol Group ta opera terminal 4 di JFK Airport na New York, Incheon International Airport na Sur Korea, Brisbane Airport na Australia y Hong Kong International Airport na China.

Ministerio di Finansa di Gobierno di Hulanda ta doño di Schiphol Group pa 69,77%, municipio di Amsterdam ta doño pa 20.03%, municipio di Rotterdam ta doño pa 2.2%, Aeroports de Paris ta doño pa 8%. Aña 2019 tabata un aña record, cu 1615 miyon Euro na entrada, di cual nan a paga 155 miyon Euro na dividendo. Na aña 2020, pa prome biaha den e ultimo decadanan, nan a perde placa y nan trafico di pasahero a cay cu como 70%. Nan tin 2324 empleado

Tocante Aruba Airport Authority

Aeropuerto di Aruba ta un entidad priva maneha pa Schiphol Group. Su nomber ta dedica na e ex hefe di Estado di Reino Hulandes, esta Prinses Beatrix. Nos ta un di e poco islanan den Caribe cu ta ofrece e facilidad di US Border Pre-Clearance. A habri e terminal pa avionnan priva desde aña 2007. Awendia ta maneha 2.8 miyon pasahero pa aña.

Di acuerdo cu historia, na aña 1934 Manuel Viana a lansa un servicio semanal pa Corsou, cu opcion pa biaha y manda carta. Na december di e mesun aña KLM a tuma e servicio aki over y despues a muda e operacion pa un pista cu despues a haya nomber fo KLM Field. Durante di dos guera mundial a uza e Aeropuerto di Aruba pa e forsa arma di Merca pa defende barconan den Caribe y e canal di Panama contra submarinonan Aleman. E tempo ey a cambia nomber di e aeropuerto pa Dakota.

Dia 22 di october 1955 a bolbe cambia e nomber pa Prinses Beatrix durante un bishita Real. Na aña 1980 a cambie pa Reina Beatrix ora el a asumi e funcion. E aeropuerto cu nos conoce awe ta existi desde November 1972. Un expansion grandi a start na aña 1997 y dia 1 di september 1999 a inaugura e edificio cu nos conoce awendia, cu ta inclui area grandi di consecion, 8 posicion pa avion y edificio separa pa check-in vuelo pa Merca y pa otro destinacionnan.

Aruba Airport Authority N.V., trahando den relacion estrecho cu Schiphol Group, ta maneha un aeropuerto moderno y eficiente, cu tres diferente edificio cu hunto ta forma e terminal. Nos Aeropuerto ta conta cu 66 ticket counters, oficina pa aerolinea nan y centro di compras pa pasaheronan biahando pa Merca y pa otro destinacionnan. Nos ta un di e poco paisnan na mundo cu tin presencia di e facilidad di U.S. C.B.P, esta Inmigracion y Aduana Mericano riba nos isla, pa facilita pasaheronan y “pre-clear” vuelonan prome cu nan yega Merca.