FUTURA a “lock” riba Spiraal Rotonde

Awe mainta algo pasa di 10:00am a presenta un formamento di fila largo pa y for di e Spiraal Rotonde, situa net dilanti Aeropuerto Internacional Reina Beatrix.

Polis a constata cu un Trekker cu number A-445 perteneciendo na Biblioteca Nacional di Aruba tabata para memey di e rotonde y su tras un trailer cu a los memey di caminda. Consecuentemente a forma poco fila riba e Green Corridor, no necesariamente pa e forma con e trailer a pega, sino mas bien di chauffeurnan haciendo caweta of sacando potret di e sucedido. 

Na e sitio chauffeur di e truck a conta cu e trailer ta di FUTURA, e proyecto digital promovi dor di Gobierno. E trailer ta move di scol pa scol, promoviendo uzo di computer y sistemanan completamente digital y futuristico pa alumnonan. 

Como cu e Bibliobus ta for di servicio, e empleadonan di Biblioteca Nacional mes ta duna un man y ta move cu e trailer di FUTURA di un punto pa otro. Awe mainta esey no tabata diferente, pero durante e transporte algo a bay robes. 

Chauffeur di e truck mes no ta compronde kico a sosode pero durante cu e tabata birando riba e rotonde, e trekker a lock y consecuentemente e trailer a los y bay wanta riba e taira di e trekker. Na momento cu esey sosode e sistema di siguridad di e trekker mes ta activa y ta stop e transporte mesora. 

Mecaniconan di Arubus, cu ta encarga cu mantencion di e trekker y e trailer, a sali mesora for di Wayaca pa asisti den e fayo tecnico. Polis a pidi nan pa tene cuenta cu e trafico, pues pa por duna un man mas lihe posibel. Den un rato a presenta cu un forklifter pa hisa e trailer y bahe for di e tairanan di e truck. 

Asina cu esey a bay bon, a reverse e mesun trekker y “fit” e bek bou di e trailer y sali bek cune. Mester menciona cu eynan presente nos a nota un union grandi bou di chauffeurnan di trekker pasobra por lo menos 9 di 10 cu a pasa a para y ofrece pa yuda. No a dura mas cu 20 minuut pa e trailer por a move y e fluho di trafico subiendo Green Corridor of Watty Vos Boulevard a normalisa atrobe.