Fundeshi di O Condominium ta e basha di mas grandi di ATCO Concrete Products

1272

ATCO Concrete tabatin un trabou grandi, a entrega concrete pa fundeshi di O Condominium. E trabou a cuminsa diabierna pa 6:00pm, unda e empleadonan a prepara, transporta y descarga concrete pa e fundeshi aki. E proyecto aki ta esun di mas grandi cu ATCO Concrete Products a yega di basha.

Pa por a basha e fundeshi ATCO Concrete Products a produci y entrega un total di 1224 cube cual ta representa un transporte di 153 truck di 8 cube, asina Robert Fingal, Operation Manager di ATCO Concrete a bisa. Den e periodo di 30 aña di existencia di ATCO den e ramo di concrete, esaki ta e entrega mas grandi cu e compania a yega di realisa den 1 biaha. E trabou a tuma luga den un forma sumamente exitoso y bon organisa.

Robert Fingal a gradici e doñonan di e construccion pa e proyecto aki, kendenan a pone nan confiansa den e compania di ATCO Concrete cu ta serio y capaz di produci e calidad y cantidad di truck den un tempo cortico, pero tambe ta duna un tremendo servicio. E calidad di concrete tabata B-30 y cu un ‘dichtingsmiddel’ special cu ta un sistema cual ta repela awa pa asina proteha e fundeshi contra e ambiente cu tin rond di e area.

Pa por a haci henter e trabou, ATCO Concrete a haci uzo di dos shift di 35 hende den un periodo total di 24 ora continuo, pa asina produci e cantidad rekeri pa e proyecto. Aparte di esey tabatin otro contratista pa haci e afwerking y tambe esunnan cu ta controla e calidad pa e doño di e proyecto.

Tocante ATCO Concrete Products NV.

Desde aña 1988 a crea ATCO Concrete Products, e tempo ey riba parkeerplaats di Hyatt Regency Hotel & Casino. Esaki tabata nan di dos cliente, e prome tabata Sonesta Hotel. Na 1992, ora a caba cu construccion di Hyatt, a muda pa nan localidad actual na Barcadera. Ta bon pa bisa cu na un principio e compania tabata haci uzo di un planta di concrete cu por a produci un total di 16 m3 pa ora. Mientrastanto, den e añanan, debi na demanda y mercado, a inverti den un di e plantanan di concrete mas grandi y moderno den henter Caribe, cual tin un capacidad di produci 120 m3 pa ora.

ATCO a basha e fundeshi di mas grandi den nan historia

Posted by 24ora on Monday, May 7, 2018