Fundashon Stimami Sterilisami ta preparando pa lansa su campaña nacional di sterilisacion di cacho y pushi pa 2022. Danki na contribucionnan generoso di Bucuti & Tara Beach Resort, Aruba Tourism Authority, Aruba Bank, Setar N.V., Ewald Biemans, huespednan di Bucuti y residentenan local, e fundacion lo por cuminsa cu su campaña di sterilisacion pa 2022!
E programa cu a wordo inicia y pa gran parti financia door di Bucuti & Tara Beach Resort y a wordo sosteni door di otro organisacionnan, a logra sterilisa aproximadamente 27,724 cacho y pushi entre 2016 – 2021. “Aunke esaki ta un logro grandi, nos ta hopi leu di logra nos mision pa resolve e problema di sufrimento di cacho y pushi riba caya,” Biemans ta splica. “Sin sterilisacion, un cacho of pushi ta reproduci exponencialmente. Awo cu nos mester a stop pa seis luna, nos ta wak e situacion cu nos a traha asina duro pa mitiga, birando pio atrobe. Tur dia nos ta wak mas y mas cacho of pushi bandona. Pesey nos ta sumamente agradecido na tur organisacion y persona cu a contribui y nos ta cla pa cuminsa duro bek den 2022. Nos ta haci un yamada na e poblacion pa porfabor sterilisa boso mascota na tempo. Keda pendiente pa mas informacion den un paar di dia.”
Fundashon Stimami Sterilisami ta un non-profit organization cu ta uza 100% di tur donacion pa ofrece subsidio parcial pa e procedura di sterilisacion pa tanto publico en general, como tambe organisacionnan di boluntario cu ta cuida bestianan di cas of riba caya. E organisacion su bukinan ta habri y ta wordo controla pa asina brinda transparencia total di e uzo di fondonan. Pa esnan cu kier aporta na e gran causa aki, por haci donacion directo na Fundashon Stimami Sterilisami, cuenta: Aruba Bank 6012630190.
