Fundashon birgen di rosario ta responsabilisá serka minister Hensley Koeiman

Sinku dia despues ku a kita e “lock down”, Minister di Asuntonan Sosial, Labor i Bienestar, señor Hensley Koeiman di forma personal, teniendo kuenta ku e distansia sosial, den e normal nobo, a risibí di Indra Rossen-Lucasius e kuenta anual 2019 di Fundashon Birgen di Rosario (Birgen). Birgen ta un di e fundashonnan ku ta kai bou di responsibilidat di Minister Koeiman.

E kuenta anual aki ta konsistí di un deklarashon di aprobashon dor di e kantor di akountant Ernst & Young Accountants. Apesar di e echo ku Minister Koeiman tin hopi trabou, el a traha un espasio pa risibí e kuenta anual ariba menshoná. E kuenta anual di 2019 tin un defisit di ANG 233.412,00. For di aña 2018 Fundashon Birgen di Rosario ta hasi su máksimo esfuerso pa baha gastu dor di introdusí medidanan pa subi entrada i medidanan pa baha gastu. E resultado pa 2019 ta resultá den un oumento di e entrada ku ANG 327.956 i un bahada di gastu ku ANG 280.866. Esaki ta enserá un mehorashon di e resultado final di eksplotashon di ANG 608.822.

E fundashon ta wòrdu supervisá dor di un Hunta di Supervishon konsistiendo di e presidente señor Hugo de França i demas miembronan ku ta Lionel Sint Jacobs, Jurjen Bade, Clara van Zinnicq Bergmann i Maritza Martis, mientrastantu ku Indra Rossen-Lucasius ta presidente di e Hunta di Maneho.

Teniendo kuenta ku e obligashonnan formulá den e “Landsbesluit Subsidie” instituí dor di País Kòrsou, e kuenta anual mester wòrdu añadí na e petishon pa supsidio di Fundashon Birgen di Rosario pa aña 2021 ku a keda entregá promé ku 1 di mei 2020 na e Ministerio di  Asuntonan Sosial, Labor i Bienestar. Di e forma aki Fundashon Birgen di Rosario ta demonstrá ku bou di supervishon di e Minister di SOAW, señor Hensley Koeiman, e ta kumpli na un di e kondishonnan formulá den e “Landsbesluit Subsidie”.