Ayera, diadomingo 24 di juni, ingeniero, comerciante y Presidente di Grupo Sambil Salomón Cohen Levy a fayece na Caracas, Venezuela, caminda awe nan lo hib’e na su ultimo luga di sosiego. Salomon Cohen Levy a desaroya un carera extenso, determina y pasiona. El a construi un grupo importante di inmobiliaria, ganando afeccion y consideracion den tur area di sociedad Venezolano.
Salomón Cohen Levy a nace na Jerusalem dia 28 di mei 1927, den un famia Hudiu Sefardi y a yega e ciudad di Caracas cu su famia na edad di tres aña caminda el a bin completa tur su estudionan. Despues di a gradua na aña 1951 como Ingeniero Civil na Universidad Central de Venezuela, el a cuminsa traha na Ministerio di Trabou Publico. Na 1958 el a funda Constructora Sambil y a cuminsa desaroya edificionan residencial, comercial y di oficina. Na aña 1998 e la expande e grupo di inmobiliaria y a cuminsa e construccion y administracion di centro di compra y hotel, inaugurando Sambil Caracas como e prome centro di compra cu a habri caminda pa un cadena rond e pais y tambe crusando frontera na Republica Dominicana, Corsou y Madrid, Spaña.
Den Caribe, riba dia 28 di mei 2015 Sambil Curaçao a habri su portanan pa publico. Situa den e area di Veeris y asina formando parti di e bida diario di e famianan local y tambe bishitantenan internacional di Corsou.
Grupo Sambil ta basa riba balor y principionan inspira pa e bida di Salomón Cohen Levy, su capacidad pa trabou y su determinacion. Resumiendo, e filosofia di fundado di Sambil ta: “Confiansa y respet, tambe ta factornan esencial pa construi exito. Agrega tambe determinacion, boluntad y sa pa warda pa no descurasha pa obstaculonan cu bo ta topa”. E caracter familiar di e grupo, caminda ya e di tres generacion ta vincula ta otro di e aspectonan mas destaca di Sambil ya cu esaki Salomón Cohen Levy durante henter su bida a cuida hopi bon.
