E parti mas importante cu e Fundacion Teen Challenge, cu ta enfoca riba e parti di rehabilitacion y yuda esnan cu problema cu adiccion, ta cu mester luga pa por recoge tur e personanan aki, segun Ivone Simon Andrade. .

E fundacion a haci su investigacion y ta kere cu tin diferente edificio unda cu por aloca e personanan aki. Sinembargo e departamentonan of e maneho den e departamentonan aworaki no ta funciona optimal. P’esey tambe, como fundacionnan cu ta atende cu e diferente problemanan aki di adiccion, a dicidi di  uni. Tanto Teen Challenge Aruba, Fundacion Elizier, Addopt an addict, y otronan a cuminsa uni den diferente reunion hunto cu algun parlamentario tambe, pa vocifera e preocupacion, unda cu no por warda mas.

Fundacionnan a uni pa lucha contra adiccion: No por warda mas

Fundacionnan a uni pa lucha contra adiccion: No por warda mas. Click link pa mas https://24ora.tv/31AkOlB

Posted by 24ora on Monday, October 21, 2019

Segun sra Simon, e problema ta hopi profundo caba y no por keda warda un dia mas pa esaki ta resolvi. E accion mester a sosode hopi luna pasa of desde momento cu sigur nan sa cu nan a sinta. Nan ta un team cu por yuda departamentonan di gobierno y traha hunto cu e fundacionnan pa asina hunto alivia e situacion. E ta un preocupacion di tur, di e nacion completo di Aruba. Nan ta haya cu no ta solamente gobierno tin cu haci su parti, fundacionnan tin cu haci nan parti, comunidad tin cu haci su parti. Tur dia ta haya grito di auxilio di e famianan, pero tambe di adictonan cu ta pidiendo auxilio. Mescos cu tanto persona por aloca na cada centro, cu na e momentonan aki ta habri, cierto momento man ta yen y no por haci mas cu esey, siendo cu si tin espacio otro caminda of por ta structura di tal forma cu por aloca algun persona mes, e lo ta un gran alivio. Mester di espacio por ehempel pa e fase di intake of detox, pa asina prepara nan pa bay den exterior, cu ta sumamente importante. Fundacion Adult & Teen Challenge ta hiba un programa hopi estricto. Pa esaki ta percura pa por haci un intake, un preparacion cu den e caso aki studiante, prome cu por duna nan un beca (ayudo), mandando nan pa exterior na diferente pais, tanto na Canada como Merca ,cu ta yuda cu esey. Republica Dominicana tambe ta yuda. Tur pais unda cu tin e Teen Challenge, ta saca man pa yuda otro.

El a splica cu e programa di rehabilitacion ta traha di tal forma pa fit cu e persona. Pero pa hinca un persona den un programa asina, e ta tuma tempo na preparacion, cuminsando pa saca e persona for di riba caya te ora cu nan ta cla pa pone nan riba avion y manda nan mesora, despues di e preparacion. Y e preparacion aki ta loke cu ta tuma luga den cooperacion cu departamentonan concerni. Nan tin cu pasa den e parti psicologo, psikiatra, preparacion di laboratorio cu tin cu haci. Esey ta e parti cu kier ta mas uni como fundacion, pero tambe cu e departamentonan di gobierno. Ta pidi cooperacion y atencion  tambe di  minister pa mas atencion na e problematica aki.

“Di berdad no por warda mas. Esaki ta afectando nos economia, pasobra e ta reflehando den e parti di criminalidad den nos turismo. No por bisa cu ta haciendo fiesta of habriendo hotel of haciendo otro fiestanan, siendo cu tin un problematica unda cu ta poniendo e mesun turismo aki den un riesgo, mirando cu e turistanan ta victimanan grandi, mescos e pueblo di Aruba ora nan ta horta nan pa por yega na nan adiccion.”

“E ta afecta nos tur como un nacion y nos tur ta responsabel pa yuda den esaki,” segun sra. Ivone Simon Andrade.

Accion

Andrade a splica cu a haya diferente yamada di mayornan preocupa. Na momento cu a wak cu tin un team, nan a keda hopi contento y nan a yama. Tin cu agrega cu na momento cu a yama bek, nan tabata desapunta pasobra no tabata tin feedback. Ta cera cierto edificionan problematico, pero e no ta resolve e problema. Tampoco no tin luga pa esnan cu ta bay bao di curatela. Famianan no ta start e proceso aki mas, pa motibo cu no tin luga pa alberga ningun persona cu ta bay bao di curatela. E fact team, cu ta bay scucha e famianan, ta cu nan no a haya e feedback manera cu tabata. Eynan tin hopi pa traha riba dje.

Un miho atencion

Mester bin un accion hopi lihe, un plan di accion. Tin hopi hende cu tin curason pa traha den e proyectonan aki tanto como boluntario como esnan di e fundacionnan. Sigur esnan cu ta den e veld y cu ya ta trahando pa e departamentonan aki. Den area di adiccion bo no por pone cualkier persona traha, ya cu bo mester por trata y tin un amor incondicional pa e hendenan aki y compronde nan tambe pa asina guia nan na e caminda pa yega na rehabilitacion. E ta un proceso den cual bo mester tin hopi pasenshi, pero bo mester por cuminsa un caminda. “Trabao di team ta hopi importante. Tanto fundacionnan como departamentonan di gobierno mester traha mas uni. Esey ta loke ta enfocando hopi riba dje y  boga tambe pa asina por logra di wak luz den horizonte, cual na e momentonan aki no tin ainda.”

Comments

comments