Fundacion Watty Vos y AVP a recorda Watty Vos

Diabierna atardi, riba fecha di natalicio di e fayecido gran politico Watty Vos, dirigentenan di Partido berde a acudi na santana unda Fundacion Watty Vos tabatin un ceremonia di ofrenda floral.

E persona cu ta guia e fundacion , Edu Vos, ta sobrino di e fayecido politico y a recorda su omo Watty Vos como “un persona cu a haci hopi pa nos pais. Nos ta aki recordando tur e trabou cu el a laga atras pa nos. Un persona cu tabatin un trayectoria largo como politico, Minister pero tambe un gran ser humano.

E enseñansa cu el a laga pa nos, nos ta recorda y trata di sigui cu su ehempelnan den nos bida diario,” Edu Vos a bisa. Palabra di elogio so tabatin pa e politico, cu riba e fecha di 16 di augustus no solamente ta recorda e fecha di natalicio di Watty Vos pero tambe ta e fecha cu el a crea Scol di Polis 44 aña pasa. Te dia di awe Watty Vos ta wordo recorda y ainda muchanan di scol ta acudi na e fundacion pa informacion di e politico aki. E politico a move riba diferente tereno y un persona cu su porta semper tabata habri pa comunidad. E tabata duna conseho huridico gratuitamente na esnan cu no por a paga un Abogado, cu ta un di e motibonan pa cual e tabata hopi stima.

Lider di AVP, Mike Eman, un gran amigo di semper di Watty Vos a participa den e ceremonia di ofrenda floral, hunto cu su coleganan di partido. “Nos ta aki pa conmemora Watty Vos, un personahe cu a nifica hopi pa pais Aruba. Ora cu Aruba a cuminsa e ultimo fase pa e lucha pa Status Aparte, Watty Vos tabata un figura prominente para cerca di tur e lidernan den henter e transcurso pa realisa e soño ak. Un persona cu na e momentonan critico, formacion di e prome Gabinete, tabata un Minister cu a yuda rescata economia di Aruba. Semper el a resalta den su capacidad pa maneha su carteranan cu un toke hopi humano.” Eman a expresa di a siña hopi di dje pa mustra compasion y convivencia ora cu pueblo ta den un situacion dificil. P’esey semper e lo keda den curason den esnan di Aruba.