Dia 21 di mei ultimo Fundacion Telefon pa Hubentud Aruba tawata presente na Sint Maarten pa asina aki presenta dos ‘Best Practices’ cu nan ta usa den na operacion di Telefon pa Hubentud Aruba.
Fundacion Telefon pa Hubentud Aruba a wordo aserka pa e ‘Interlandelijke Taskforce Kinderrechten’ pa asina aki comparti nan conocimento cu otro islanan den Reino Hulandes. Señor drs. James Sneek (Direktor na Fundacion Telefon pa Hubentud Aruba) y señor Shurman Milliard (Trahador social na Fundacion Telefon pa Hubentud Aruba) a representa Fundacion Telefon pa Hubentud Aruba.
Señor Sneek a presenta “Best Dad Ever”, cu ta un projecto cu ta stimula e participacion di tata den educacion di nan yiunan. “Best Dad Ever” ta un proyecto cu a ser desaroya basa ariba cifranan na Aruba cu ta mustra cu e participacion di tata den educacion di nan yiunan na Aruba ta swak. No solamente na Aruba pero tambe algun partner den Reino Hulandes tambe ta experienciando esaki. Durante e presentacion a para keto ariba e meta y beneficio di e proyecto. 
Señor Milliard a presenta “Ayudo telefonico/ internet pa mucha y hoben”. Fundacion Telefon pa Hubentud Aruba ya pa 20 aña ta duna e servicio gratuito, anonimo y confidencial na nos mucha y hobennan di Aruba. E conocimento amplio y profesional aki a ser comparti cu nos partnernan den Reino Hulandes. Mester menciona cu Fundacion Telefon pa Hubentud Aruba ya caba ta yudando Sint Eustatia yega na nan mesun ayudo telefonico/internet pa mucha y hobenan. Na anja 2016 y 2017 e fundación tawata na isla Bonaire pa duna curso di prevención di termento nan scol na docente y mayor.
Banda di a comparti hopi conocimento, experticio y experiencia cu nos partnernan den Reino Hulandes, por bisa cu for di e bishita aki cooperacionnan entre Fundacion Telefon pa Hubentud Aruba y otro partnernan den Reino Hulandes a nace. Asina por menciona e cooperacion entre Fundacion Telefon pa Hubentud Aruba y ‘St. Kinderbescherming Curaçao’ pa yuda nan crea nan app pa asina comunica cu nan mucha y hobennan.
Otro partnernan den Reino Hulandes manera Bonaire y Sint Maarten tambe a aserka Fundacion pa ayudo cu tur dos proyecto. Y di e manera aki e fundacion ta cumpli cu su di dos obhetivo cu a wordo stipula na anja 1999 cu ta comparti nan conocimiento, experiencia y dato cu otro organización pa di e manera ey contribui na e bienestar di mucha y hoben.
