Lamentablemente, desde 26 di maart 2020, Fundacion Salud Mental Aruba (FSMA) Respaldo apesar di e medidanan di precaucion tuma contra COVID-19 ta bringando pa evita mas contaminacion den e Clinica. Diabierna pasa Respaldo a confirma un total di 16 caso positivo pa loke ta trata COVID-19. Ta trata aki di 8 cliente y 8 empleado di e Clinina (antes PAAZ). Te cu 29 di maart no tin casonan nobo. No obstante e situacion aki Respaldo ta sigura cu ainda e ta keda brinda servicio na su clientenan cu ta un grupo vulnerabel.
Respaldo a tuma nota di un mensahe di voz cu ta circulando rond via whatsapp, unda ta indica cu e contaminacion encuestion ta trata di coleganan di Respaldo cu a bay Miami, cu no a haya instruccion pa tuma e medidanan di cuarentena manera indica pa DVG.
Respaldo ta desmenti e acusacionnan aki mirando cu Repaldo a tuma tur medida di preocaucion desde dialuna 16 di maart, pa cual nursenan di tur 3 di Respaldo prome cu a nan regresa bek di Miami, a wordo consulta pa nan zorgmanager, kende a percura pa haci e preguntanan specifico y a duna instruccionnan pa cu kico ta e medidanan di precaucion. Un di nan cu tabatin sintoma di griep, a meldziek y ta desde e dia ey ta na cas. Mientrastanto tur 3 nurse a wordo evalua y a test negativo pa Coronavirus.
Pa Respaldo ta hopi importante pa menciona cu tur regulacion pa cu e cuarentena a wordo instala desde 17 di maart. Pues Respaldo mirando y siguiendo noticianan internacional a traha cu hopi precaucion preventivo desde 16 di maart caba pa preveni cualkier forma di contagio.
Respaldo ta haya fastioso cu anonimamente sin base personanan den comunidad ta haci uzo di e momento aki pa crea panico y daña nomber di un instancia manera Respaldo.
Debi cu Respaldo ta cuida e grupo vulnerabel aki asina hopi, ya desde inicio di e anuncio di COVID-19 Pandemia, Respaldo a bin ta prepara pa posibel infeccion cu lo por bay tuma lugar. Pues e organisacion a ehecuta un protocol pa reduci e riesgo pa contaminacion.
Despues di e prome casonan nacional infecta cu e COVOD-19, ta imposibel evita y controla contacto cu personanan cu lo tin e virus aki cu 100% certesa. E medidanan y protocol na Respaldo Clinica a drenta na vigor di biaha despues cu e prome resultado positivo a wordo anuncia na Aruba.
E medidanan aki a wordo comparti y coordina cu tur otro organisacionnan concerni importante na Aruba, Gobierno di Aruba, Departamento di Inspeccion y AZV.
Apesar di e medidanan tuma pa e organisacion ta splica aki e liña di tempo pa cu casonan positivo COVID-19 a wordo detecta:
• 24 di maart: 1 colega
• 25 di maart: 1 colega
• 26 di maart: 1 cliente, 5 colega
• 27 di maart: 6 cliente, 2 colega
• 28 di maart: Tur otro colega di clinica y clientenan cu potencialmente por a wordo contami a wordo evalua y a test negativo pa COVID-19
Desde ayera no a detecta ningun caso nobo di posibel contaminacion.
Mas cu claro a considera pa tuma medidanan ainda mas drastico, mientrastanto Repaldo ta haye hopi importante pa por sigui brinda bon atencion na esnan cu mas mester di dje y na mes momento haci tur lo posibel pa evita cualkier infeccion di COVID-19.
Respaldo ta splica cu e situacion actual:
• Ningun persona cu a resulta positivo ta den mal estado
• 5 di e coleganan no tin hopi sintoma di e virus mas
• Contaminacion a tuma lugar un parti di e clinica so, primordialmente e banda di dagverblijf. No tin ningun señal di contaminacion den e otro areanan di clinica of pafo di clinica.
• Pa loke ta trata esnan trahando den clinica a sa di uza maximo profesionalismo pa sigui brinda tratamento riba un nivel minimo di calidad, cu hacie ainda factibel pa maneha. A reduci dianan liber y coleganan cu no tabata pone riba lista pa traha a bin traha pa asisti clinica y nan clientenan.
Desde siman pasa cu a publica e prome casonan di infeccion dentro di clinica Respaldo a tuma medidanan adicional pa precaucion pa evita mas contaminacion den clinica pa tanto nan coleganan como nan clientenan.
Mas cu claro a considera pa tuma medidanan drastico despues di e prome 2 resultadonan positivo, pero mirando e gran necesidad pa atencion psikiatrico na Aruba, cu ta aumenta den momentonan di stress y crisis, esaki no tabata un opcion realistico cu ta cuadra cu e norma y balornan di FSMA Respaldo.
Cu e realidad aki nos dilanti, Repaldo ta haye importante pa tin balanse pa por sigui brinda bon atencion na esnan cu mas mester di dje y na mes momento haci tur cos posibel pa evita cualkier infeccion di COVID-19.
Pues pa realisa esaki a crea medidanan adicional:
· A amplia e area di isolacion den e edificio; unda e empleadonan tabata traha y unda e clientenan a bay den cuarentena; pues dependiendo e risico-analyse lo por amplia esaki pa ful e edificio.
·Tur colega y cliente cu tabata den clinica durante e periodo di contaminacion lo wordo evalua y lo bay den cuarentena en espera di e resultado di e test di COVID-19.
·Tumando na cuenta e perdida inmediato di mas cu un personal cu ta e motor cardinal den clinica, lo bay traha conhuntamente cu partners di Gobierno y na Hulanda pa por haya sosten di profesionalnan adicional pa por asisti den e temporada aki. Pues lo mester wak den ki forma lo por trece e coleganan aki Aruba obstante cu nos espacio aereo ta cera, mas cu claro lo tuma medida di precaucion di cuarentena prome cu nan cuminsa traha na clinica.
Desde 28 di maart a activa e siguiente medidanan:
•Tur cliente y coleganan a wordo evalua y a haci nan test
• E parti rediencial di clinica a wordo completamente separa di e resto di clinica
• E hecho cu 8 cliente a wordo infecta y ta test positivo pa e coronavirus desde e anochi di 27 di maart, a implementa e siguiente medidanan:
- Respaldo a separa tur cliente cu a test positivo pa keda den un parti di clinica, mientras tur esnan cu a test negativo ta keda den quarantine den e otro parti di clinica. A reubica tur cliente riba dia 28 di maart merdia.
- Respaldo a pone hekwerk di DOW pa separa e clinica den tres y di e forma aki percura pa e clientenan no bin den contacto cu otro.
E fundacion ta sigura di tin tur material cu mester pa proteccion adicional di tanto nan clientenan como coleganan cu ta traha di cerca cu clientenan cu a test positivo. Tur esaki di acuerdo tambe e accionnan sigui pa DVG y di Outbreak Management Team di Hospital.
Actualmente ta mustra cu e ekipo di Respaldo a sa di haci e adaptacionnan rapido y urgente pa monitoria nan clientenan y e empleadonan di clinica pa contene e contaminacion di COVID-19. Lastimamente no por garantiza cu lo no tin mas caso di infeccion den clinica. Pero si ta garantiza cu a haci lo maximo pa reduci e posibilidadnan pa contaminacion lo mas posibel. Tambe por garantiza cu e posibilidad di contaminacion pa afor a wordo exclui.
Respaldo ainda ta mantene e standard pa brinda servicio na nivel. Tur esaki ta posibel hunto cu e esfuerzonan di e crisisteam di Gobierno, Hospital, DVG, DOW y mas cu claro e team completo di Respaldo.
Fundacion Salud Mental Aruba – Respaldo ta spera cu tur hende por recupera pronto y cu Aruba por supera e COVID-19 Crisis aki.
Pa mas informacion of pregunta por semper yama Respaldo of bishita nos website www.respaldo.aw/ Facebookpage.
