Ta di conocemento comun cu e lista di spera pa tratamento mental ta hopi halto. Esey casi no ta e caso mas, segun director di Fundacion Respaldo, dr. Hendrikus van Gaalen. Den un entrevista reciente, el a splica cu a logra elimina casi tur, particularmente esunnan di pashentnan adulto. Sinembargo, e operacion y resultadonan aki den cuido mental ta bay na costo di hopi maniobra y ahuste cu e entidadnan ta haci y ta convenci cu e avance lo tabata mas grandi si tabata por a traha cu e fondonan necesario.
“E wachtlijst pa respaldo tabata hopi halto. Nos a logra elimina casi tur wachtlijst pa adulto y cu problema complica. No a logra ainda pa menornan di edad, esta bou di 18 aña. Eynan tin un wachtlijst ainda di 40 siman,” asina dr. van Gaalen a elabora. “Si nos no haya cen, mi no por tuma hende. Si mi no por tuma hende, e wachtlijst ta bay crece atrobe.” A indica cu no por yena vacatura door di e recorte. Tampoco a renoba cierto contracto y ta coriendo peliger calcula pasobra no tin suficiente personal den e clinica.
Aworaki e lista di spera di adulto ta entre tres a seis siman. E ta algo cu dr. van Gaalen ta orguyoso di dje pasobra ta un diferencia grandi di loke e tabata prome. Algo cu a yuda den esaki ta cu a separa casonan complica cu Respaldo mes ta atende, for di esunnan menos o no complica cu a pasa pa Sociaal Psychiatrische Dienst (SPD) den un espacio na edificio di AZV.
Pa e relato completo, lesa TREMPAN
