Fundacion Rancho preparando pa apertura di Hanchi Awa dia 22 di Maart

Ya caba limpiesa a tuma luga pa loke ta e tanki di awa cu ta situa den rancho. Tabata un trabao monumental, caminda cu tanto Brandweer como Serlimar a yuda saca tur e sushi cu tabata tin e tanki aki.

Tur esaki tin di haber cu apertura di e Hanchi Awa cu ta tuma luga dia 22 di Maart proximo.

Den un rueda di prensa, presidente di Fundacion Rancho, Clifford Rosa, a splica cu e proyecto aki ta uno andando y cu ta bay yega na su culminacion otro siman, cual ta apertura di e hanchi.

E hanchi aki a yega di traha riba dje, pero e biaha aki ta bay pone e borchi pa asina inaugura e hanchi.

Fuera di e actividad aki, tin diferente otro cos cu a sosode. A cuminsa cu tayer y loke e artistanan ta bezig cun’e, pa asina embeyese e luga. E trabao den conhunto cu diferente otro instancia y organisacionnan, caminda cu por bisa cu e tanki di awa aki, cu ta un monumento protehi.

Un danki ta bay na instancianan cu ta traha den proteccion di monumento, pa asina duna e oportunidad pa embeyese nos luga, mirando cu pa Rancho, ta sumamente importante e dos monumentonan cu tin eynan, cual ta e forno di kalki y e tanki di awa.

E biaha aki ta bay pone hopi mas atencion riba e tanki di awa y tambe riba e tema cu tin como Dia Internacional di Awa, cual ta riba dia 22 di Maart.

Tur esaki ta den contexto pa asina concientisa comunidad y tambe sostenedornan. Tur loke tin di haber cu educacion, cual esaki tambe ta forma parti di esaki, pa asina yuda transforma loke tin di haber cu mehoracion di Rancho.


Plan

Rosa a splica tambe cu nan ta trahando hunto pa asina educa e comunidad cu ta frecuenta rond di e monumentonan aki. Tur otro hende sa cu tin biaha kico ta e reglanan di monumento y ta atene na dje. Sa si cu tin un comunidad cu falta educacion den e parti di herencia, e parti di con bo ta conserva y preserva e historia monumental.

Kico ta spera e dia ey

Mescos cu ta trahando riba e cuater hanchinan cu ta adopta, como “adopt an alley”. Ta un proyecto cu ta biniendo caba pa algun tempo. Ta mira cu esaki ta un proyecto cu ta sigui bay p’adilanti, mirando cu no tin un punto final ainda pa bisa cu e hanchinan ta cla. E cuater hanchinan tin mester di atencion y awor aki ta poniendo hopi mas atencion riba e hanchi di awa, mirando cu e ta uno central, despues di hanchi Kalki, pa asina conserva y embeyese.

Pa hopi tempo caba ta trahando pa mantene e luga limpi, pa concientisa, traha hunto cu e otro instancianan, pa asina ey por tin un luga cla pa bishita, pa nos hendenan local, pa studiante, pa nos muchanan, pero tambe pa nos bishitantenan cu ta bin como turista.

Turistanan

No tin un proyecto inicia cu por bisa cu ta enfoca riba turismo. Pero si ta preparando esey. Ta mira cu tin hopi turista cu automaticamente ya caba ta drenta mas den e bario y busca e monumentonan aki pa mira, a asina ey nan saca potret of tin nan informacionnan, mirando cu toch den e mapa general di Oranjestad, tin cierto areanan cu ta wordo anuncia of presenta den e bukinan di turismo.

E zona

No ta mira si e ta un zona peligroso. Por mira si como cu ta hopi cerca di e area turistico, of di e fluho turistico, ta desea cu otro instancianan tambe por mira e importancia aki cu tin mester di mas atencion, no solamente den e parti di edificionan, pero tambe den e personalidadnan cu ta moviendo den e area.


Mas actividad

Jinelly Quandt ta coordinador na Centro di Actividad Rancho y el a anuncia tambe e apertura cu ta bay tin dia 22 di Maart, cu ta un dia special, manera cu sa ta Dia Internacional di Awa, unda cu lo tin apertura di Hanchi Awa. Lo devela e borchi den e hanchi y tambe ta bay haci un actividad, unda cu tin un programa yena entre 5’or di atardi y 7’or di anochi.

Pa 5’or, ta bay tin un mobilab bus pa mucha, unda cu tur mucha ta wordo invita pa bin den e bus, sinti tiki di e tecnicanan cu nan ta uza, traha printmaking, etc.

Pa 5’or y mey ta wardando e invitadonan oficial. Tambe e sponsornan cu ta bin pa asina duna un discurso pakico a sostene den e proyecto aki.

Tambe ta bay tin palabra di gradicimento na e sponsornan y tambe pa pueblo en general y tambe e artistanan, cu a yuda hopi mes den e proyecto aki.

Tin tambe un subasta un pintura di Tanki di Awa, cu ta pinta pa Ciro Abath, kende a yega di haci un donacion riba esaki. Ta bay tin snacks y coi bebe. Tur hende ta invita pa bin wak e monumento cu tey den e hanchi cu ta e tanki di awa, cu ta hopi importante pa e fundacion. Tambe tin e muchanan, cu a traha nan arte durante e luna aki na Centro di Actividad, unda cu tabata tin un stensil workshop, unda cu ta pinta nan stensil cu nan a traha riba e muraya. E ta bira un actividad basta yen. Ta invita henter pueblo, muchanan, hende grandi, tur hende cu kier sa di e monumento y kier sa di tiki di arte, y di parti di e Fundacion, por duna informacion riba e dia aki, esta dia 22 di Maart, cual ta Dia Internacional di Awa.


Comments

comments