Fundacion Plataforma Aruba ta un realidad

Plataforma Aruba ta anuncia e lansamento oficial di e fundacion, un organisacion non-profit cu ta kere den e efectonan positivo di e combinacion di arte y enseñansa. Plataforma Aruba ta cuminsa cu e proyecto Arte Contemporaneo den Biblioteca y un Pilot Program den e Orthopedagogisch Centrum Aruba. E lansamento a tuma luga diabierna merdia dia 5 di juli na Biblioteca Nacional Aruba (Oranjestad).

Plataforma Aruba ta desaroya actividad y proyectonan pa e comunidad Arubano combinando arte visual contemporaneo y enseñansa. Mision ta pa crea experiencianan unda ta aporta na e comprendemento di arte visual contemporaneo, preserva Aruba su herencia cultural actual via documentacion y e produccion di material academico y contribui na e profesionalisacion di e sector local.

 

E enfoke riba arte contemporaneo local a bin di e interes pa comparti y enfatisa su rol importante den nos sociedad. Arte visual contemporaneo ta expresa y materialisa e pensamento, escencia y realidad di nos comunidad actual. E ta aporta na e conscientisacion cultural y ta reenforsa participacion sano den comunidad y cultura. E combinacion di arte y enseñansa ta brinda un oportunidad pa desaroya metodologianan educativo nobo cu ta ofrece un enfoke mas integral, amplio y relevante pa e comunidad. 

Plataforma Aruba ta un iniciativa di historiador di arte, Ana Maria Hernandez, cu experiencia den e area di programacion y maneho artistico contemporaneo. E organisacion ta wordo acompaña pa un Raad van Toezicht cu ta inclui artista visual contemporaneo sra. Osaira Muyale y gestor cultural sr. Angelo Tromp. E proyectonan ta colaboracionnan cu artistanan local, organisacionnan cultural y instancianan di arte visual contemporaneo local y e netwerk profesional internacional. Proyectonan den 2019: Arte Contemporaneo den Biblioteca ta un colaboracion cu Biblioteca Nacional Aruba unda ta brinda e comunidad Arubano un coleccion di publicacion relevante tocante arte visual contemporaneo. E proyecto lo ser acompaña pa un serie di eventonan na Biblioteca Nacional (Oranjestad) cu lo toca temanan di e publicacionnan den e coleccion. 

Pilot program den e Orthopedagogisch Centrum Aruba ta un colaboracion cu OCA unda Fundacion Plataforma Aruba lo desaroya un module pa un grupo di hobennan den e institucion, incorporando arte visual contemporaneo. E proyecto ta un test pa investiga metodologianan nobo den e sector di enseñansa y responsabilidad social haciendo uzo di arte como vehiculo di comunicacion y expresion.

Pa medio di colaboracionnan, Plataforma Aruba ta desea di por contribui na e preservacion di nos herencia cultural actual y apoya e artistanan local, aportando asina na un relacion sano y fuerte entre e sector di arte contemporaneo local y e comunidad di Aruba.

Pa mas informacion: Fundacion Plataforma Aruba, www.plataformaruba.org of ta accesibel telefonicamente +297 56318 33 of via e-mail: [email protected]