Fundacion Parke Nacional Aruba (FPNA) a tene recientemente un siman di educacion y conscientisacion durante nan prome “Conservation Week Aruba 2020”. FPNA ta mira bek riba e siman special aki como uno exitoso y cu potencial pa ripiti.
E siman di conservacion a inicia cu dia internacional di conservacion di ecosistema di mangel, unda e Junior Rangers a lansa un tremendo video educativo encuanto e importancia di nos mangelnan. Durante e siman, e Junior Rangernan a uni forsa y hunto a logra un clean-up na sitio Ramsar SpaansLagoen.
Durante e siman a enfoca primordialmente riba e tarea di conservacion cu FPNA ta eherce diariamente y con esaki lo continua despues di a ricibi areanan di reserva natural adicional bou di su maneho algun siman atras. E topico aki a wordo elabora durante FPNA su “Online Webinar” cu a hiba e topico di trabou di conservacion den practica. Esaki lo ta disponibel pronto ariba e website y rednan social di FPNA.
E siman aki no a pasa sin reconocimento. Ariba diamars, 28 di juli, dia mundial di conservacion a reconoce y honra Sra. Olinda Rasmijn cu e palo di wayaca dilanti e centro di bishitante. Awor e “Wayaca di Olinda” ta recorda nos di su pasion y dedicacion pa naturalesa y pa conserva e palo di wayaca durante e fase di construccion di nos centro di bishitante.
Diabierna 31 di juli, a toca turno pa reconoce e rangernan di FPNA pa nan trabou riba Dia Mundial di Ranger. Un fecha celebra internacionalmente y sigur uno cu FPNA ta celebra pa asina brinda un gradicimento na tur e trabou cu e trahadonan ta eherce diariamente pa asina proteha Aruba su herencia natural.
Por ultimo FPNA a organisa su famoso Rough Hike, unda participantenan a disfruta di un mainta den naturalesa hunto cu ranger Rambo, kende a guia tur participante durante un caminata di 5.8 KM. Sigur un palabra di gradicimento na e comunidad di Aruba cu a sigui FPNA riba rednan social y asina forma parti di e prome siman di conservacion na Aruba.
Preparando pa proximo siman di conservacion den 2021, FPNA lo aprecia cualkier recomendacion di contenido y actividadnan. Pronto FPNA lo invita e comunidad pa duna nan ideanan via rednan social.
