Parke Nacional Arikok, cu awor a bira Fundacion Parke Aruba, a firma un “Beheer overeenkomst” cu Ministerio di Infrastructura y Medio Ambiente dialuna atardi na nan sede den Arikok.
Presente na e ceremonia tabata e mandatario encarga cu FPA Otmar Oduber, miembronan di Directiva y Hunta di Supervision di FPA. Tur esnan envolvi den maneho di e parke durante un aña largo a bin ta trahando riba cambionan cu mester tuma luga pa e servicionan cu e parke mester brinda. 
E acuerdo ta pa fortifica e tarea cu FPA ta eherce den nomber di pais Aruba, den proteccion di e flora y fauna. E Parke Marino y e 16 areanan protegi tambe ta bay cay bou di FPA, unabes cu tur e documentonan ta cla.
E acuerdo ta nifica cu Gobierno ta pone e responsabilidadnan cu nan ta spera cu FPA por ehecuta mientras cu Parke di nan banda ta consciente cu si tin espacio necesario pa maniobra y maneha esaki conforme deseonan di Gobierno y e “Good Corporate Governance” cu mester tin den departamento y fundacionnan cu Gobierno tin un relacion di trabou cu nan.
Tambe e acuerdo ta encera cu Parke ta haya algun algun tereno den Parke Arikok cu ainda tabata den mannan priva.
E acuerdo ta encera cu denter di poco e relacion no ta bay ta mas uno di subsidio sino uno di contribucion di Gobierno pa e Fundacion Parke Aruba. E ta duna Parke un instrumento adicional pa traha cu mannan mas liber sin intervencion di Gobierno, evita cu ta impone pensamento of plannan.
E director, Roland de Cuba, a expresa su satisfaccion cu a yega asina leu cu por a firma e acuerdo di maneho, ya cu e convenio cu lo duna Parke mas flexibilidad den su operacion. Nan tarea di conservacion y educacion di loke nan ta para p’e, treciendo comunidad mas cerca di naturalesa, ta bira mas facil cu e sistema di maneho aworaki. Tanto directiva como Hunta di Supervision a bin ta trahando e cambionan aki pa hiba Parke dilanti.
