Fundacion Orguyo: Ta condenabel haci uzo di mal comportacion di otro pa condena henter comunidad di LGBTQ+

Fundacion Orguyo Aruba a tuma nota di algun video cu ta pasa rond, cu ta ilustra mal comportacion di algun turista cu a bin Aruba riba barco crucero den siman. Fundacion Orguyo Aruba ta condena y distancia di tur comportacion cu ta contra e leynan penal di Aruba. Como tal ta lamenta loke algun di e turistanan di e barco crucero a causa. E comportacion di algun no ta refleha e normanan di e gran mayoria den e comunidad LGBTQI+.

Condenabel tambe ta e mal uzo di algun persona y organisacion, pa uza mal comportacion di algun pa demonisa henter e comunidad LGBTQI+. Nos sa cu den tur parti di nos sociedad e actonan castigabel ta tuma luga, y cu e personanan cu comete esakinan mester carga e consecuencia cu esaki ta trece cu n’e. Esaki ta conta igual pa hetero, LGBTQI+, rasa, religion, afiliacion politico y tur otro denominacion cu por ta existi. No por uza actuacion di algun, pa trece tur hende cu ta pertenece na un denominacion den luz negativo.

Ta lamentabel cu ta uza mal comportacion di algun pa sigui fomenta odio contra di e comunidad LGBTQI+. Homofobia, stigma y discriminacion contra e personanan LGBTQI+ por afecta e salud y bienestar di e comunidad aki negativamente.

Pa e motibo aki, na luga di fomenta odio contra un parti di nos sociedad, ban traha riba un Aruba inclusivo na unda tur hende por biba den harmonia cu otro y por yega na desaroya na nan mayor potencial.