Fundacion Mi Voz ta Bo Voz ricibiendo hopi producto cu di dos food drive

Fundacion Mi Voz ta Bo Voz ta dilanti Giselle Department Store unda tin nan di dos food drive. Desde 12:00 di merdia te cu 6:00 di atardi nan at eynan pa ricibi comestibelnan pa nan paketenan di cuminda pa esnan den necesidad.

E fundacion ta agradecido na tur cu ta yudando. Desde trempan tabatin hende para ta warda pa duna nan donacion. Loke cu nan ta pidi ta aros, pasta, pasta saus, salchicha tuna, cosnan di bleki. Pero tambe ta acepta cosnan frozen manera carni, berduranan di paki cu nan ta pone nan den freezer. Riba nan Facebook page tin e lista detaya di productonan manera lechi, cornflakes, bonchi.

Segun Lisette Gomes, preesidente di e fundacion, e necesidad pa cuminda ta hopi grandi. E ta sorprendente pasobra hopi hende a perde nan trabou, diripiente a perde nan salario. E fundacion ta yuda, pero tin instancianan y otro fundacionnan ta haci esaki y no ta suficiente p’e cantidad di hende cu mester e yudansa. Nan tin un formulario pa hendenan yena, tambe ta tene contacto via whatsapp cu e personanan. Ta papia cu nan y yuda nan ki caminda nan mester cana. E fundacion ta duna nan e pakete di cuminda, pero ta purba di yuda nan pa tin un tiki solucion pa plaso largo.

Pasa y ban yuda hopi cu mester cuminda:Fundacion Mi Voz Ta Bo Voz tey Diadomingo cu su Food Drive dilanti Giselle na Noord di 12PM pa 6PM

Posted by 24ora on Sunday, May 31, 2020

Desde trempan nan a ricibi hopi cos di esnan cu tabata warda. A conta cu presencia di celebridad manera beisbolista, Tanchi Esmee y otronan. E celebridadnan ta tuma e productonan y di biaha e boluntarionan ta haci nan limpi pa asina den siman sali parti. E celebridadnan tabata contento di por a yuda cu e food drive. Segun Tanchi Esmee, den e momentonan aki pa tur yuda otro, aunke cu por ta tambe ta pasando den problemanan financiero. A scucha hopi storia y nunca a pensa cu esaki no lo a yega, pero esey a pasa.

A haci tur cos limpi, sortia e productonan, y den siman cuminsa traha e paketenan. Pa fin di siman nan lo ta entregando e paketenan di cuminda. Tambe nan a pone un bleki pa donacion di placa y cu esey cumpra cosnan cu falta.