Fundacion Mi Voz ta Bo Voz lo yuda muchanan cu campaña “Back to School”

111

Fundacion Mi Voz ta Bo Voz a cuminsa 10 aña pasa e lucha contra di abuso sexual di mucha bou Fundacion Lisette Gomes. A bin ripara durante aña cu mester amplia e meta di e fundacion y p’esey awo tin e capa nobo Fundacion Mi Voz ta Bo Voz.

E fundacion t’ey pa tur esnan vulnerable, pa tur tipo di abuso pero e enfoke principal ta abuso sexual di mucha. Manera tur aña comunidad por a conta cu Fundacion Lisette Gomes, por conta cu Fundacion Mi Voz ta Bo Voz. E ultimo 3 lunanan a enfoca riba esnan den comunidad afecta p’e Covid-19. A yuda cu pakete di cuminda y ta di lamenta cu no por sigui cu esaki.

MVTBV ta anuncia diferente campaña pa nos comunidad

Posted by 24ora on Friday, July 10, 2020

E motibonan ta cu esaki ta bira hopi trabou p’e fundacion y reaccion di e ultimo food drive no a bay mes bon compara cu e otro dosnan. E siman aki e fundacion lo ta entregando nan ultimo paketenan. Tur loke e fundacion resta, lo entrega nan sea na Fundacion Pa Nos Comunidad (FPNC) of otro fundacionnan cu ta parti cuminda. Tampoco no lo tuma registracion di niun hende. Segun Gomes, nan a yuda mas o menos 500 famia y lo pasa esaki na FPNC p’asina esnan cu no ta registra eynan por registra, unda nan lo por ricibi ayudo di e fundacion.

Fundacion Mi Voz ta Bo Voz su enfoke principal ta keda e muchanan y esnan vulnerabel. Nan tin un campaña di “Back to school” y lo ta un poco mas grandi. Tin un caha na Bluesky band’i rotonde di Tanki Flip. Si haci un compras eynan por deposita sea un tas, potlood, schrift, etc. pa yega na un cantidad grandi pa yuda muchanan. Lo por haya un registro riba e fundacion su pagina di Facebook y por registra esnan den necesidad. E fundacion lo tuma contacto cu nan pa por haci entrega. E campaña a inicia desde 9 di juli y lo ta te 9 di augustus.