Fundacion Mi Voz ta Bo Voz a ricibi un melding di un mucha cu ta depende 100% di pediasure como alimentacion. E persona aki no lo cobra su salario di e luna ey y p’esey e mama ta preocupa. E ta un preocupacion pasobra mas o menos 2 luna pasa AZV a stop di duna pediasure.
Den su desesperacion, e mama a contacta e Fundacion Mi Voz ta Bo Voz pidiendo yudansa. E fundacion no por nenga y ta traha p’e cosnan aki, segun Lisette Gomes presidente di Fundacion Mi Voz ta Bo Voz. Nan a haci un yamada na comunidad y e resultado tabata positivo. Loke nan a ricibi tabata inmenso y p’esey ta gradeci na tur hende cu a trece boternan di pediasure. Sin e boternan aki e mucha no por alimenta su mes.
E fundacion ta conta semper cu comunidad ora di pidi pa yudansa. Esaki tabata un di esnan mas grandi, mirando cu ta trata di un mucha di 6 aña. Tur hende a saca man pa yuda, pero e fundacion a bin haya sa cu mas mucha na Aruba ta depende di alimentacion via tubo. E casonan aki a bin acerca, manera un mucha di 7 aña cu tambe ta depende di pediasure pero ta bebe solamente e sabor di vanilla. E fundacion a yama e mama y splica e situacion di e otro mucha. El a compronde cu tin di yuda otro persona.
Ta purbando di cera e cantidad pa henter luna. Mientrastanto e fundacion ta mirando kico lo bya pasa cu AZV si ta bay tin excepcion pa nan of no. Pa tuma contacto cu nan por haci esaki via e fundacion su Facebook page Mi Voz ta Bo Voz. Nan ta yudando otro dos hoben cu ensure y e fundacion ta ricibiendo esaki.
E fundacion ta concentrando riba nan food drive di diadomingo cu lo ta dilanti Giselle Department Store, asina Gomes a bisa. Desde 12:00-6:00PM hendenan por pasa na e food drive y laga e comestibelnan. Esaki ta e di dos food drive, cual anterior a colecta pa 150 famia den 4 ora. A resta cosnan cu nan lo uza pa parti. Tambe lo conta cu presencia di celebridadnan cu a destaca un forma of otro aki na Aruba, sea den deporte, DJ tambe lo ta presente. Nan tur lo fungi como boluntario haciendo yamada na nan fanaticonan y amistadnan pa haci donacion.
Gomes a expresa cu mayoria donacion ta bin di personanan individual y pa esaki nan ta agradecido. Esnan cu ta den necesidad por subi e pagina di Mi Voz ta Bo Voz, yena e formulario. Ta pidi pa informacionnan pasobra no por parti pa loco. Nan tin cu mira esnan cu mas mester pa haya e yudansa prome y despues ta sigui cu e otronan.
