Pa e fundraising cu Fundacion Mi Cutisa (FMC) ta organisa pa recauda fondo, principalmente pa por maneha Museo Cas Tan Tin, e “Concierto Bailabel di Aña” lo tuma luga na Balashi Arena Entertainment Center cu un presentacion di “Doble R Puru” di Corsou. Dia 12 di augustus 2022 “Robert y su Solo Banda Show”, cumpliendo 30 aña di existencia y legendario Papito Rafael cu “Papito y su Nuevo Sabor” lo brinda e miho di nan musicalmente. E tres bandanan aki ta legendario y a duna un contribucion significante den desaroyo musical Antiano den Caribe Hulandes. Nan a percura pa mantene y traspasa nos musica di tumba, wals, dansa y salsa Antiano riba tur e islanan di habla Papiamento. Tambe FMC ta organisa un charla unda lo bay papia riba trayectoria di e tres musiconan aki. Riba peticion di Robert Jeandor FMC a acerca Ruben Garcia pa tene e charla riba trayectoria di Robert Jeandor y di Papito Rafael. Lamentablemente, pa motibo di salud, e charla riba e musiconan di Aruba lo no sigui. Rene Rosalia a acepta e ora pa duna un charla di un ora riba e trayectoria di Rignald “Doble R” Recordino.
Orador Rene Rosalia
Antropologo Rene Rosalia (PhD) for di Corsou a investiga pa hopi aña e trayectorio di Doble R y lo bay tene un charla basa riba un analisis cu el a haci di casi 50 aña di desaroyo musical. E lo ta un presentacion riba e nificacion di e trabou musical y balor literario di Rignald Recordino. ‘Doble R’ a produci mas di 500 composicion cu nos hendenan na Aruba, Boneiro y Corsou, no solamente a disfruta di nan, pero a siña hopi di nan a traves di e mensahenan cu Rignald ta manda den su letranan. Entre otro e aña aki Rignald Recordino mes ta publica un buki di su historia musical y cu e letranan di tur composicion cu el a publica.
Programa dia 10 di augustus 2022
E programa lo ta for di 7:00 pa 9:30 or di anochi y ta conduci pa Addonsito Croes. Despues di e charla tin oportunidad pa dialogo y pregunta. Lo clausura e presentacion cu un recepcion den cura di Universidad di Aruba. Cupo ta limita na 90 persona, pero por sigui e charla riba e facebookpage di Mi Cutisa.
Importancia di e trayectoria y impacto cultural di “Doble R”
Rignald Recordino su composicionnan tin un variacion grandi den su forma di skirbi. Su texto- y topiconan cu e ta uza pa su composicionnan ta tipico di Rignald Recordino. E forma di compone su piesanan, particularmente su forma unico di combina tanto instrumento como e forma di canta un piesa, t’e aspectonan completamente innovativo.
Rene Rosalia lo amplia mas riba e impacto cu Rignald Recordino tabatin riba nivel social y musical pa e tres islanan ABC.
Educacion Cultural
Mirando cu e charla aki ta forma parti di e desaroyo di educacion cultural cu lo bay hunga un rol importante riba tereno di cultura mundialmente despues di e pandemia di Covid 19, FMC a acerca Universidad di Aruba pa coopera cu organisacion di e charla aki. Danki tambe na e Comision Nacional di UNESCO y Aruba Bank, Departamento di Cultura di Aruba. E perspectiva ta cu e charla aki lo haya e interes di varios musico, pero tambe di hopi fanaticonan di Doble R na Aruba. Tambe p’e studiantenan di Universidad di Aruba, di IPA y di EPI e charla aki lo tin un balor agrega riba tereno di investigacion y documentacion. Pa tur hende cu ta gusta musica di e islanan Aruba, Boneiro y Corsou, esaki lo ta un anochi interesante y educativo.
