Fundacion Lotto pa Deporte contento cu sosten di a Prensa

Stichting Fundacion Lotto pa Deporte a organisa un anochi sumamente placentero, dedica specialmente na tur miembro di Prensa riba nan dia. Pa e ocasion bunita aki teni na Heart Music Cafe a conta cu presencia di representantenan di diferente medio di comunicacion,
entre nan television, radio y prensa skirbi.

Tur hende a gosa di e tremendo musica, e pasabocanan, co’i bebe y di mes un ambiente espectacular. Flavio Faneyte, representante di Stichting Fundacion Lotto pa Deporte a expresa palabranan di gratitud y tambe estimulo pa cada un medio di prensa di nos isla. El a bisa cu e evento a bay den un forma tremendo. “Nos ta sinti bon ora cu nos por duna atencion na prensa, aunke debi na e ocasion un bes pa aña so nos ta haci’e” Faneyte a subraya cu constantemente Lotto pa Deporte como e deportistanan constantemente ta haya atencion di prensa dia pa dia y nan ta gradici esey. Esaki nan ta uza como un forma pa gradici prensa pa e tremendo trabao cu nan ta haci pa cu deporte, el a agrega. Segun Flavio Faneyte, e ta kere cu den futuro lo sigui tene eventonan pa prensa. Lo kier sigur dialoga tocante e maneho den deporte aki na Aruba, mirando cu Lotto pa Deporte tin pensamentonan grandi pa cu deporte pa e siguiente añanan cu ta bin.

“Mi ta manda un felicitacion pa nos minister di deporte Dr. Alex Schwengle cu ta duna hopi atencion na deporte. El a haci un trabao tremendo den Lotto, den e maneho y den cuida e fondonan cu ta wordo dedica na deporte, caminda cu por aloca nan awendia y den futuro, directamente pa e deportista y pa e facilidadnan deportivo. Prensa por conta cu nos apoyo pa hopi evento mas di awo pa dilanti”, e representante di Lotto pa Deporte a manifesta.