Fundacion Dominicana Arubaanse Juan pablo duarte ta brinda yudansa na personanan cu no tin trabou

316

Fundacion Dominicana Arubaanse Juan Pablo Duarte ta haciendo varios donacion na personanan cu ta den necesidad. E fundacion ta yuda basicamente cu e productonan di prome necesidad. Nan ta agradeci na New China Club hunto cu Fundacion Pa Nos Comunidad p’e bunita gesto pa cumpli cu e demanda di comestibel p’e personanan cu ta yamando pidiendo pa esaki.

Winston Tavares, presidente di e fundacion, a bisa e personanan cu ta trahando no ta bin na remarca pa haya comestibel cerca nan. Mester compronde cu tin situacionnan unda hendenan ta trahando y ta pidiendo ayudo di comestibel. Pero e ayudo ta pa esnan cu no ta trahando actualmente.

Fundacion Dominicano Juan Pablo Duarte ta haci entrega di donacion na esnan den mas nececidad

Posted by 24ora on Thursday, June 4, 2020

Esnan cu mester di ayudo ta yamando na 5921679, 5623093, 5674544 of e number di oficina 5825890, el a bisa. Tambe hendenan ta tuma contacto cu nan via e Facebook page di Fundacion Dominicana Arubaanse Juan Pablo Duarte. For di momento cu COVID-19 a cuminsa e fundacion a yuda mas o menos 400 persona. P’e luna aki tin 200 persona riba lista cu mester yudansa.

Algun miembro di e fundacion ta aportando y algun comerciante chikito tambe ta haciendo esey. Nan ta haciendo un apelacion na e comerciantenan di Republica Dominicana cu por aporta na e fundacion, tambe un grupo di Dominicano si por uni y acerca e fundacion pa por cumpli cu e demanda, nan ta mas cu bon bini.

Tambe e fundacion ta haci apelacion na otro comerciantenan di Aruba pa contribui cu e demanda cu tin actualmente, pa asina por brinda mas yudansa na e comunidad. E fundacion ta pone den e saconan papel di wc, buscuchi, lechi, hotdog, cornflakes, sopi, boonchi. Nan mester di aros. Segun Tavares esnan cu kier haci donacion di esaki ta bon bini. Por pasa laga e donacion na e fundacion.