Fundacion Dominicana Arubaanse Juan Pablo Duarte cu varios evento pa Dominicanonan

Fundacion Dominicana Arubaanse Juan Pablo Duarte por medio di su presidente Winston Tavarez ta haci un apelacion na e comunidad Dominicano pa participa den un actividad cu nan ta organisando riba dianan 5 y 6 di september, esta diahuebs y diabierna.

Ta trata aki di un control di salud cu ta tuma luga na nan sede cu ta situa den e edificio na skina patras di Botica Oduber. For di 8.30 di mainta ta cuminsa cu control di entre otro colesterol, presion y sucu. Pero tambe e profesionalnan presente ta tuma midi di tur cu ta haci test, esta nan ta chek bo haltura, bo peso y midi di bariga.  E controlnan aki ta masha importante, principalmente awo cu ta den temporada di hopi calor y a recorda cu mester bebe hopi awa.

Cedula

Na mesun momento Tavarez a splica cu Dominicanonan cu nan cedula a vence of pa cualkier motibo mester di un tarheta di identificacion nobo, por pasa na oficina di e Fundacion, (patras di Botica) pa inscribi bo nomber. Na momento cu tin un lista cu basta hende lo mand’e pa e Hunta Central Electoral, den cooperacion cu Consulado di Republica Dominicana.  Fundacion kier yega na un lista grandi p’asina e Hunta por biaha pa Aruba pa haci e procedura di saca e cedulanan nobo. Pero nan no por biaha te cu Aruba pa solamente 10 hende, pa cual ta haci un apelacion na tur esnan cu mester di e documento aki pa registra nan nomber na oficina di e Fundacion. Esnan cu nunca a saca cedula, mester bini cu un copia di nan acta di nacemento. E deseo ta pa e Hunta biaha pa Aruba prome cu december.

Docente

E fundacion tambe ta den preparacion di diferente curso pa cual tin demanda. Pa e motibo aki nan ta haci un apelacion na docentenan cu kier colaboracion cu e fundacion, pa pasa na nan oficina. Ta papia mas tanto di curso di Papiamento y Ingles. Por yama 5825890 of manda un whattsapp na 5921679.

Por ultimo el a haci un yamada general pa miembronan inactivo pa reactiva nan miembrecia, pasobra e Fundacion ta brinda hopi ayudo na su miembronan di e colonia Dominicano na Aruba.