Aruba Offroad Foundation ta un organisacion di doñonan di companianan di UTV y ATV cu ta bisa lo bay sinti e consecuencianan di e maneho nobo cu Gobierno kier bini cu ne.
E fundacion ta consisti di mas o menos 20 compania, consistiendo di mas o menos 200 traha y 600 miembro di famia cu ta depende di e sector aki. Awo cu Parke Arikok a bini cu medidanan drastico pa no permiti awo ni ATV ni UTV drenta, ta pone existencia di e companianan na peligro. Ta sinti cu tin descriminacion pasobra tin otro vehiculonan di motor si ta drenta e parke.
Jean Carlo Espinal, kende tabata presente na e conferencia, a splica cu su compania tambe ta huur ATV y UTV. Hopi hende ta papia di daño cu e vehiculonan aki ta causa na naturalesa. E ta sinti cu ta un campana a cuminsa pa destrui e empresanan.
El a bisa cu esaki ta e miho momento pa dialoga enbes di bataya otro na bienestar di pais Aruba. Nan a compronde cu ta papia di 16 area protegi, pero te ainda, apesar di e pidi, no sa kico ta bay bira e plan. Nan punto principal ta pa sinta y yega na un acuerdo cu tur hende por biba cu ne. Tur e companianan aki ta splica tur nan clientenan unda cu e vehiculonan aki por core y unda no.
Nan a lesa di e informa di Parke Arikok cu entrante prome juni ta bini un paro completo na ATV y entrante 31 di October na UTV. El a bisa cu no mester lubida cu nan tin diferente hoben empresario cu a cuminsa den e area aki y kendenan cu e prohibicionnan menciona, practicamente lo perde tur nan inversion.
Banda di esaki no mester lubida cu Aruba ta depende di turista y hopi biaha e reservacionnan ta wordo haci adelanta. Tin algun di e companianan miembro di e fundacion ta huur ATV of UTV. No tin otro entrada.
P’esey nan ta haci un apelacion pa yega na un acuerdo na mesa.