Fundacion Conserva Area Cristal ta considera nan mes un voz di naturalesa den nan bario

Fundacion Conserva Area Cristal a tene un conferencia di prensa, caminda cu e directiva a wordo presenta na prensa. Cu Luis Irausquin como presidente, a probecha e ocasion pa informa habitantenan di Sero Cristal y vecindario, como tambe prensa, di e desaroyo cu tin, pa motibo cu desde aña pasa tabata tin cierto desaroyonan cu a tuma luga y e fundacion tabata activo y a forma parti tambe di e proceso den nos sistema hudicial y corte. A base di esey, e fundacion a duna e informacion riba e situacion actual.

George Rodriguez, kende ta tesorero di e fundacion y tambe habitante di Sero Cristal, a comenta cu atrabes di e rueda di prensa, ta e unico manera pa por comunica cu gobierno, en particular cu e minister di husticia, pa hacie preguntanan publico. Den e ultimo simannan a busca contacto cun’e, pero esey tabata imposibel. E ora a busca e unico medio cu a keda cu ta prensa, pa asina por comunica cu nan tocante e ultimo desaroyonan.

Ta bay riba e proceso cu a cuminsa desde December cu a pasa, caminda cu mas di 300 di e obhecionnan a wordo entrega pa 3 compania, cu a puntra pa un obhecion pa asina nan por sigui coba pa santo of otro compania pa por traha cu beton.

Desde e tempo ey e minister ta bezig cu e proceso, pa asina bin cu un solucion riba e obhecion cu e habitantenan a entrega.

Pa recapitula, dia 24 di Juni, 2018, e fundacion Conserva Area Cristal a ricibi e ultimo contesta di minister di husticia, despues cu e directiva a pidi por escrito un update di e proceso di e hinderverordening. Minister a laga directiva sa cu Gobierno ta bezig pa un solucion en general. Minister di Medio Ambiente a pidi cooperacion di e fundacion pa por lo menos un compania, ta bay muda a termino cortico. E fundacion a manda nan condicionnan, pero nunca a tende si e minister a haci algo cu nan.

Mientras tanto, habitantenan di area Cristal y amantenan di naturalesa ta ripara cu e actividadnan pa bende santo y grijs a continua normal, aparentemente sin hindervergunning.

Den e ultimo simannan tin basta transporte di saconan di cement pa Boedoei y transport for di Boedoei, di blokinan di beton masha grandi mes.

Ta masha dificil pa obtene un bista di e situacion na un manera transparente.

Segun Rodriguez, den e ultimo tempo aki no tin ningun transparencia. E fundacion ta trahando mas cu un aña cu sosten di e bario riba e problema aki. Pesey e fundacion ta haci publicamente e siguiente preguntanan na minister y personanan eligi y nombra den parlamento, pasobra te cu awe, ningun parlamentario a vocifera su opinion pa kico e ta pensa den e situacion cu e habitantenan ta papiando.

Den prensa no por a mira nada kico ta nan opinion.

E preguntanan

1. Minister y parlamentario y directornan a yega di bishita e tres terenonan di Boedoei y Babijn?
2. Nan mes a mira e daño enorme cu a wordo haci na domijngroend di pais Aruba? Tin un rapport cu a wordo traha pa DIP, caminda cu ta ilustra cu mas cu 90 mil vierkante meter di terenonan cu tin a wordo daña door di coba pa santo, pa nan por a bende. E terenonan cu a wordo usa y cu a wordo daña, cu ta wordo registra den un rapport cu a sali na DIP.
3. Dicon e minister di husticia no por dicidi riba e peticion di e hindervergunning y tur e obhecionnan?
4. Dicon minister di husticia ta manda carta pisa pa un di e companianan, pero no a ehecuta su bestuursdwang pa stop su actividadnan industrial den e area di naturalesa? Pa aclarea, Rodriguez a comenta cu e companianan a hiba Gobierno corte, caminda cu nan kier a sigui cu nan trabao, en espera di un decision di Gobierno, unda cu nan a haci un peticion na huez pa nan por a sigui cu nan trabaonan. Huez a nenga nan peticion. Fundacion tambe a uni nan mes den e lucha hunto cu nan pa asina por a sostene gobierno pa nan no por a sigui cu nan trabaonan, tanten cu gobierno a tuma un decision kico e ta bay haci cu e obhecionnan.
5. Dicon e minister di husticia ta permiti pa compania nenga e vonnis di huez. E vonnis tey, caminda minister Bikker a bisa varios biaha den prensa, unda cu gobierno a gana e caso ey, cu nan mester warda te ora cu Gobierno tuma un decision. Truck ta bin, truck ta bay y si bo no schuif cu coba santo, bo no tin truck ta core riba abao pa transporta santo y pa mira tur e cementnan cu ta drentando awor aki den e area.
6. Dicon ambos minister no ta tuma e habitantenan di e bario na serio? E habitantenan ta masha preocupa pa medio ambiente, pa nan salud y e bario.
7. Dicon ambos minister tin miedo pa extra casonan hudicial, pero si ta obliga fundacion pa hinca su mes den gasto, pa asistencia legal? No sa pakico tin cu warda asina tanto. Si ta di bin cu algo, bin cun’e.
8. Dicon minister di medio ambiente nunca a reacciona riba e condicion di fundacion pa e periodo di transicion pa tur compania pa muda. Fundacion ta opina cu tin un area industrial, caminda cu e companianan, cu por eherce nan trabao eynan. No tin nada contra di nan, nada contra di e companianan as such, pa por bende nan cement. No mas ta cu e luga caminda e ta haci’e, ta den un area di naturalesa y den un area di naturalesa, un compania di beton no ta pas aden.
9. Dicon ningun parlamentario ni director di departamento no ta tuma e asunto na curason? Rodriguez no por imagina cu tin 21 parlamentario cu ta bezig tur dia cu casonan di Aruba. Ta considera na mes como habitantenan, como e gobierno y parlamento, nan ta esunnan pa salvaguardia e bienestar. Nan ta e guardiannan. Nan ta suppose di cuida e pueblo. Pero no ta scuchando nan. Ta scuchanan di hopi otro cos, pero no di naturalesa, no di loke ta pasando na Sero Cristal, ni nan ta vocifera nan opinion. Bo por ta pro of contra. Pero door di bin un discusion riba con ta bay cu e area Cristal y nos naturalesa, por yega na solucionnan. Naturalesa no ta papia. Naturalesa no por duna su opinion. Naturalesa ta keto. Bo ta schuif’e, solamente tin biaha bo por hayabo den problemanan natural grandi, caminda cu e ta cobra bek loke b’a kita di dje. Tin cu duna naturalesa un voz y e fundacion ta considera nan mes como e voz di naturalesa specificamente den e area Cristal.