Shortcutz Aruba ta e plataforma internacional di peliculanan cortico. Aruba ta e prome den region cu tin un Shortcutz.
E plataforma di cine a inicia na Portugal di cual tin 10 ciudad ta forma parti di e network di shortcutz. Hulanda, Alemania, Brazil conhunto cu Aruba tambe ta forma parti di e network. Tur pais ta intercambia peliculanan cortico, esey ta haci cu peliculanan cortico di Aruba tambe por yega na un publico mas amplio. Dentro di poco talentonan local por yega na un pubico ainda mas gradi ora cu paisnan manera Inglatera, Angola y China start cu nan Shortcutz. Sigur esaki ta un oportunidad pa talentonan local showcase nan pelicula y Aruba na mundo henter.
Durante e evento di diadomingo cu ta bini 12 di september, e publico lo por gosa di e peliculanan di Shortcutz Aruba edicion uno. Esnan cu no a logra wak e peliculanan di Shortcutz Aruba edicion uno por finalmente waknan, tur tras di otro. Tambe e personanan cu ya caba a mira e peliculanan aki caba por disfruta di nan un biaha mas. E obhetivo ta pa resumi Shortcutz Aruba 2017 prome cu start cu Shortcutz Aruba 2018. Ademas di peliculanan cortico tambe lo tin musica den man di DJ Adriano Nanof y DJ Tech, sesionnan di bahada di solo. E evento ta inicia 6’or di atardi na Ateliers ’89 cu ta situa na Dominicanessenstraat 34.
Tin posibilidad ainda pa entrega peliculanan cortico y video musical pa e Shortcutz Aruba edicion dos 2018, tur categoria ta eligibel entre otro documentario, experimental, ficcion y video art. Duracion di peliculanan cortico por ta di 1 minuut te cu 30 minuut. Lo tin un premio publico y premio hurada pa e peliculanan cortico y pa e video musical tambe tin un premio. Pa participa por Wetransfer e archivonan na [email protected].
