Diahuebs 25 di juli e tan gusta nochi di pelicula di fundacion CINEARUBA ta bek. E luga ta keda mescos cu ta Ateliers ’89 situa na Dominicanessenstraat 34. Porta ta habri 7.30 y e pelicula ta cuminsa 8’or di anochi. E siman aki lo tin e pelicula di comedia ‘Ingrid Goes West’ cu ta un pelicula R-rated.
E anochi semper ta inicia cu peliculanan cortico di Aruba su talentonan local. E biaha aki lo presenta ‘Your Turn’ di Gabriela Croes. Fundacion CINEARUBA ta e unico plataforma cu ta showcase peliculanan cortico local, promoviendo nos propio hendenan. Personanan cu kier presenta nan pelicula cortico durante CINEARUBA su nochi di pelicula por manda e pelicula cortico den formato MP4 via WeTransfer na [email protected]. Di e manera aki fundacion CINEARUBA, e unico fundacion di cine na Aruba cu ta traha pa promove cine local, lo sigui provee un plataforma na nos talentonan local, pa asina hunto crea un cultura di cine local.
Fundacion CINEARUBA ta recorda tur persona cu ainda e inscripcion pa participa na e prome 48 Hour Film Project di Aruba ta habri. Pa prome biaha Aruba lo participa na e famoso 48 Hour Film Project. Dos aña pasa Bonaire a representa nan isla na festival di Cannes na Francia. E aña aki lo por ta un grupo di Aruba cu lo por representa nos isla na Francia si logra cay den e 12 miho peliculanan. Di tur manera e team ganado di Aruba lo representa Aruba na e Filmapalooza na Rotterdam otro aña. Pa participa por registra na e pagina https://www.48hourfilm.com/aruba.
