Durante un conferencia di prensa den Peanuts Restaurant, Fundacion Bernadina Growell-Kock a anuncia nan proximo actividad, cu ta un koffiemorgen y bendemento di snackbox, na cas di defunto Bernadina Growell-Kock.

Esaki ta un evento cu hopi biaha ta organisa anualmente, pa asina bin hunto, pa t’ey den pueblo y caminda tur hende por bishita cas di Bernadina, nos mama di cultura y intercambia cu otro den un esfera navideño.

Open house y kofie morgen na cas di Bernadina Growell-Kock den feliz memoria

Posted by 24ora on Wednesday, November 20, 2019

Ta bay tin diferente agrupacion musical cu lo deleita cu nan cancion. Segun Mervin Wyatt-Ras, kende ta presidente di e fundacion, hunto cu demas miembronan, e fundacion ta trahando semper cu alma y cuerpo, cual meta principal ta pa informa nos pueblo, conscientisa nos hendenan riba e balor y importancia di nos mama di cultura, defunto Bernadina Growell-Kock pa nos pais.

Bernadina a haci hopi tanto pa musica, biniendo cu su propio composicionnan. E tabata un trendsetter, desde decada di 50 te na su fayecimento, unda cu el a influencia hopi musico den diferente bario pa asina bin cu aguinaldo, gaita, y bin cu agrupacionnan musical. El a compone diferente cancion, y a canta cu diferente agrupacion. E por a uni su mes tanto cu hoben y adulto, pa asina e por yega cerca di su publico.

Pesey, e fundacion, consistiendo di amigo, conoci y famianan, ta hopi contento di por sigui cu loke Bernadina tabata kier pa su pueblo keda mantene su memoria bibo.

Fundacion ta invita un y tur pa bin dia 8 di december proximo, pa bin presencia e actividad aki. E fundacion ta gradici tur esnan cu a duna sosten, un of otro aporte y tur boluntario, entre nan Bertha Wolff, Lilian  “Shi Preke” Besselink, Joe Orman hunto cu su casa Lena Orman-Yarzagaray, cual ta secretaria di e fundacion y Percy Jeand’or, kende ta vice presidente di e fundacion y tambe un baluarte pa e trabao cu e ta haciendo.

Pueblo tin cu keda pendiente di e siguiente proyecto, cual ta un buki conmemorativo di Bernadina, cual lo tuma luga otro aña.

E actividad

Semper e fundacion ta organisa su actividadnan, cual meta ta primeramente duna informacion y conscientisa nos hendenan y trece hende hunto. Di un otro banda, por medio di bende cuminda, bende snacks, ta haya algun fondo. Por bisa orguyosamente cu pueblo ta responde na e actividadnan aki, door di cual ta bira facil pa e fundacion pa no depende di hopi otro cos pa asina logra nan meta. Naturalmente tin meta cu nan kier logra cual ta costa placa, pero ta tumando e pasonan lentamente, pasobra no ta depende di donacionnan grandi, pa asina logra e metanan aki. Mester ta gradicido si loke ta haya di comunidad pa por sigui brinda e informacion cu ta suministra na pueblo di Aruba, comparti y haya bek di comunidad.

Di parti di Percy Jeand’or, vicepresidente di e fundacion, e ta splica cu ta brinda un dushi koffie cu su bolo, etc., alabes ta habri cas di Bernadina. Hopi hende no sa ken ta Bernadina, aunke cu e ta nos mama di cultura. Cu tur respet pa esey, Jeand’or ta invita tur hende pa dia 8 di december, cu hopi amor y cariño, bin na cas di Bernadina, disfruta di e gran evento aki y laga un cachi cachi atras pa e fundacion por sigui traha.

Si bo ta desea di bin deleita e publico cu algun musica chikito, semper ta bon bini na cas di Bernadina na Brazil. Asina ta, no lubida, dia 8 di december. Ta bay tin tent di cuminda, di bolo, tin tur cos. Mark’e den bo agenda, no desayuna e mainta aki, pa bon disfruta un dushi mainta na cas di Bernadina.

Comments

comments