Fundacion Autismo Aruba ta sumamente contento di por ta representa door di 2 miembro na loke ta bay ta un ‘intensive summer course’ riba e tema di ‘inclusive education’. Tur esaki cu e meta di trece bek informacion y conocemento valioso pa asina por cuminsa cu e projecto di Klasnan Inclusivo na Aruba.
Dia 23 di Juni 2019 Carolina Span y Joanna Croes, representantenan di FAA lo biaha pa Orlando, Florida pa e tremendo oportunidad aki, ofreci door di UCP of Central Florida. UCP ta haci e curso aki posibel y mester menciona cu e ta completamente gratis danki pa Universal Orlando Foundation.
E curso aki lo ta dirigi door di Prof. Dr. Rebecca A. Hines di University of Central Florida y algun otro expertonan ariba e tereno di educacion special. Na April di 2019 FAA a conclui un encuesta representativo unda cu e resultadonan a mustra cu aunke 77.8% di e populacion representativo ta di opinion cu muchanan den e spectrum di Autismo por atende un scol regular, solamente 5.3% ta di opinion cu nos comunidad ta ekipa pa por brinda oportunidadnan asina. E resultado nan aki a subraya e importancia di entre otro mihor conocemento di educacion inclusivo. Durante e curso Inclusive Education e miembronan di directiva di FAA lo siña e ‘best practices’ den klasnan inclusivo y lo crea coneccion cu e diferente professionalnan pa asina por prepara e proyecto.
Parti di e proyecto di Klasnan Inclusivo di FAA ta pa por traha riba asina yama ‘klas inrichting’ y brinda educadornan cu training y workshops pa asina por uza diferente metodonan pa un klas inclusivo. FAA kier subraya cu e proyecto aki aparte di ta di suma importancia pa e avanse educativo di muchanan den e spectrum di autismo e lo beneficia otro muchanan cu otro desabilidad di den desaroyo y siñamento. Fundacion Autismo Aruba ta yen di anticipacion pa e curso na Orlando y pa nos miembronan acumula e informacion y conocemento necesario, pa asina por cuminsa traha mas pronto posibel riba proyectonan importante. Particularmente pa loke ta un di nos metanan mas grandi cu ta Klasnan Inclusivo pa nos muchanan na Aruba.
Fundacion Autismo Aruba a lanta na 2005 cu e meta pa sostene personanan cu Autismo y nan famia, pa medio di campaña di consientisacion, tayer pa mayor y docente, y actividad particularmente pa muchanan cu Autismo. E fundacion ta totalmente dependiente di donacion y ta constantemente en busca di miembronan pa fungi den directiva y como voluntario.
