Fundacion ADRA Aruba, e agencia humanitario di Iglesia Adventista Mundial, a anuncia cu nan ta yuda tur esunnan cu tin mester, sin importa nan etnicidad, rasa, situacion politico of religioso. Ta yuda comunidadnan mas vulnerabel, esunnan cu tin mester den diferente forma. Ta organisa actividadnan pa por brinda asistencia.
Relacionista Publico, Rachella Dirksz a informa cu anteriormente nan a yega di organisa expo di Salud, unda cu e comunidad di Aruba por a ricibi informacion tocante salud. Tambe nan a organisa un curso di cushina saludabel, unda cu tambe e comunidad di Aruba a ricibi informacion con pa haci recetanan saludabel. Tambe nan a organisa un Thanksgiving, pa esnan mas vulnerabel den nos comunidad y esnan sin hogar, unda cu mas di 100 persona a ricibi ayudo den e Thanskgiving aki.
Nan tin un proyecto di plantacion unda ta yuda e comunidad di Aruba pa asina nan cera conoci cu e matanan di Aruba y nan uzo medicinal. No solamente den cushina pero tambe con nan por uzanan como remedi.
Actualmente ADRA Aruba tin e proyecto di mayornan hoben unda cu el a cuminsa desde september di aña pasa. Aki e mayornan hoben ta ricibi diferente curso pa asina nan por sigui nan bida estudiantil, of nan por drenta atrobe bek den bida laboral.
Aña pasa a organisa un recaudacion di fondo pa Bahamas. Esaki ta tur loke cu ADRA Aruba a bin ta haci durante e añanan.
ADRA Aruba ta bastante activo den e comunidad di Aruba, segun directora Asidra Jansen-Richardson. No tur ora nan ta den publicidad, pero ta activo si pa yuda esnan cu berdaderamente tin mes necesidad. Den e cuadro ey mes, a pone schouder bao di otro pa por yuda esnan cu a wordo afecta severamente pa Covid-19.
Nos tur sa cu no ta un, ni dos, ta un grupo bastante grandi y sa cu tin diferente NGO’s y gobierno cu ta dunando nan yudansa na hendenan aki. Pero semper tin gruponan cu pa un manera of otro, no ta bin na remarca of no a haya e yudansa. Ta pesey ADRA ta enfoca rba dje. Den e caudro ey a bin cu e plan pa duna saconan di cuminda of den forma di voucher.
Ta gradici ADRA International cual nan afilia na dje, cu a duna e sosten financiero cu nan por ehecuta e plan aki. E plan aki lo ta un proyecto di tres luna, unda cu ta purba di cubri por lo menos 450 famia cu un macutu of nan por scoge cu nan ta haya un voucher y cu esey nan por bay na, den e caso aki, na Save More y nan por cumpra nan cuminda y no alcohol etc.
A haci un research y a mira cu e necesidad tey. Apesar di hopi ayudo cu ta wordo duna caba, pero ta un necesidad enorme bao di un grupo grandi cu ta pone cu a dicidi di yena e buraco eynan.
Bo no mester ta hayando yudansa caba na un of otro NGO, pasobra ADRA kier evita cu hende ta haya dobel y uno ta keda sin haya nada. No mester ta un hende cu ta ricibi’e. Bo mester ta uno cu a wordo afecta pa Covid y no ta cay den e parti tampoco di FASE cu bo ta haya cierto yudansa financiero di Gobierno.
Si bo ta cay pafo di tur e gruponan aki, bo ta bin na remarca. Por ehempel un hende cu ta haci trabao di cas, e hende no tin un contract di trabao y e no tin un salarisslip. E hende aki no por bay Fase. Podise e no ta cumpli cu cierto criterianan of di un of otro motibo, no a bin na remarca cerca un di e NGOnan cu ta brinda yudansa.
Ta averigua esaki y si esey ta e caso, e ora ey e ta bin na remarca. Mester a haci e esfuerso y apesar cu a haci esey no a yega na remarca, e ora ADRA Aruba ta yuda. Por ta un dama, hende grandi cu tabata depende di su yiu pa yud’e, e yiu ey a perde trabao. E momento ey, e dama ey, ta pensionado si pero su pensioen no ta uno completo pa X motibo. E hende ey tambe ta yuda. E tin su pensioen, pero e tin un of otro malesa cu ta pone cu tin extra gasto.
Den e casonan aki un hende asina tambe ta bin na remarca. ADRA tin e parti con pa yega na e yudansa, ta caminda cu ta yama na telefon of via Facebook Fundacion ADRA Aruba. Number di oficina ta 7367347 of 5840777. E ora ey por duna bo nomber y tin un formulario cu e informacion ya brinda den e conferencia di prensa aki. E ta wordo yena hunto cubo y si bo ta cumpli cu tur e rekisitonan aki lo bo bin na remarca pa un pakete, of pa un voucher.
Tambe si bo mester di yudansa y aplica pa ricibi ayudo por pasa libremente na nan oficina cu ta situa na Pos Chikito 47-A, for di dialuna te diahuebs, for di 8’or di mainta te cu 5’or di atardi. Net patras di Serlimar.
Por ta e luna aki e hende ta sin trabao of por ta inscribi na FASE, pero bo no a haya e cen ainda, por bin na remarca. Sin embargo, por bin cambio den e siguiente luna, caminda cu e persona no ta cumpli mas cu e criterianan y no ta bin na remarca mas. Akinan tambe ADRA ta haci su investigacionnan pa asina nan por haci nan evaluacion riba esaki.
