Funcionarionan di Migracion condena na castigo di prizon

Awe mainta Corte di Husticia di prome instante a haya John Mathias Hodge y Shamila Daniela Garrido di e acusacionnan presenta, cu excepcion di soborno di e tres señoranan Venezolano.

E acusacionnan contra e duo aki tabata cu entre januari 2018 y 8 di mei 2019, a trafica hendenan stranhero. Tambe a acusa nan di falsificacion di documento y haya placa pa haci e tramitenan aki cu ta en pugna cu nan obligacionnan.

E ultimo aki ta esun di cual nan a wordo declara liber di dje. No a proba cu tabatin placa envolvi.

Hues a bay di acuerdo pa condena Hodge na 24 luna di prizon mientras cu Garrido mester bay sinta 21 luna den KIA. Nan ta deteni desde cu e investigacion a cuminsa.

E Magistrado a splica e acusadonan cu e castigo pidi door di Fiscal ta na su luga, mirando e funcion cu nan ta ocupa y e hecho cu nan a viola reglanan di na trabou y loke en realidad nan mester vigila pa no tuma luga, ta hustamente loke nan a permiti pa pasa.

E duo a permiti hende pasa Inmigracion sin haci e debido controlnan, a cambia informacionnan den e sistema di Migracion. Y esaki el a haci pa hendenan cu e conoce y otronan cu e no conoce, haciendo fabor pa amigonan. Asina por ehempel, a stempel paspoort pa haci comosifuera mas cu un persona a sali for di Aruba y drenta bek pa mustra cu nan ta legal na Aruba. Esaki tabata den e caso di Hodge.

Garrido a yuda su colega den esaki tambe. Den tur esaki tabatin placa envolvi, esta pago a wordo haci.

Mirando tur esaki no a keda Hues y Corte nada otro cu haya e dosnan aki culpabel.

Ainda nan mester papia cu nan abogado, mr. Illes riba e veredicto pa dicidi si nan ta apela.