Diahuebs mainta porfin famia di Zinnia Croes, e hoben di 12 aña cu a perde su bida den un accidente fatal cu a tuma luga dia 13 di maart 2015, lo por haya trankilidad y paz.
Diahuebs mainta Corte lo trata e caso penal contra e funcionario policial Jadira V., kende den su ora liber tabata maneha bou influencia y a alcansa e hobencita aki na momento cu e tabata crusando caminda na Spaanslagoenweg na Pos Chiquito.
E caso aki inicialmente a wordo poni un banda door di Ministerio Publico pa motibo di erornan cu a wordo cometi den e investigacion. Pero mayornan di e hoben a keda lucha pasobra nan tabata kier pa un Hues (Corte) dicidi ki e ta pensa di e caso aki, unda bida di nan yiu a wordo kita den un forma cruel.
E funcionario policial, kende tabata bayendo cas cu algun mucha den auto, a acepta cu el a dal algun drinks. Sinembargo algo a bay den e robes, entre otro algun sporen cu no a wordo midi, pa cual Ministerio Publico a dicidi cu no por persigui e Polis. Esaki tabata un sla duro pa e famia cu no solamente a perde nan yiu Zinnia di apenas 12 aña pero no ta mira husticia haci su trabou.
E mayornan a cana un caminda largo y mester a acudi na Corte unda ta pidi pa ordena Ministerio Publico pa hiba e caso dilanti mesa berde. E caso aki a wordo trata porta cera pa cual mucho informacion no a logra bini dilanti. E tempo ey e Abogado di e famia a bisa: “Bo no por tin mala suerte como famia, pero hopi cos a bay fout y fiscal a admiti esaki tambe. Pero nan kier toch pa e caso bin dilanti, no cu kier un castigo pa e persona, pero nan kier pa e caso wordo trata. Nan kier pa e caso bin den Corte y ta na Hues pa dicidi si e persona ta culpable of no,” e abogado mr. Faarup a declara.
Awo t’asina leu cu e caso aki ta wordo trata diahuebs mainta, cual ta e sesion di casonan unda e acusadonan ta den libertad caba.
