Elizabeth Arelys Arcaya, mama di e fugitivonan Joander y Jorge Ramirez, no tabata sa di ningun plan di su yiunan pa huy di KIA. Y no tabata sa tampoco cu nan a huy te ora cu autoridadnan a yega su cas den oranan di madruga. Segun e señora a conta 24ora.com, e diahuebs Jorge a haci aña y el a pidi su famia pa busca un lift for di ken cu ta pa nan bin bishit’e e dia ey. E mama hasta a planea pa hiba su nietonan (di Elisabeth), pero tambe e ruman y wela di Joander y Jorge pa e bishita. Normalmente e sa bay riba diasabra, si e haya un lift cu e amiga di Joander. “Pero nan a huy marduga y e bishita no a bay door mas.”
E mama ta admiti di no sa kico a bay robes cu e dos yiunan aki a cay den man di husticia. “Mi a cria nan bon. Mi yiu muhe mes ta bisa cu e no ta compronde di con nan a haci e cosnan ey pasobra mi a cria nan tur bon. Hopi hende ta critica, pero nan no ta sinta den mi sapato como mama y tata pa cria nan. Mi mes tabata bay busca nan na scol, haci nan cuminda pa nan y despues yuda nan haci nan les. Loke a bay robes ta ora cu nan a cuminsa scol grandi.” Ey nan a topa cu mal amistad, pero atrobe, e mama ta bisa, niun hende por forsa nan haci algo.
“E cos aki ta hacimi como mama hopi dolor pasobra mi no a cria e muchanan asina. Mi no sa kico a drenta nan cabes pa haci loke nan a haci y awo huy.”Despues di e prome biaha cu nan a bay cera, el a papia hopi cu nan y hasta nan a primintie di lo no comete delito mas, pasobra KIA ta vies y no ta un luga cu nan kier bay den dje. P’esey e no ta compronde pakico nan a bolbe cay y pio e hecho cu nan a huy. :”Mi no por ni drumi drechi di tanto pensa pakico nan a haci e cos aki, di huy di KIA.”
E yiunan tabatin contacto cun’e diadomingo, ora cu aparentemente nan a mira un post cu el a pone riba Facebook pidiendo Joander y Jorge pa entrega nan mes. “Nan a bisami “mami kita e cos ey for di riba Facebook pasobra ami no ta bay entrega y nan lo no haya nos nunca”. E mama splica cu el a informa autoridadnan esaki tambe. E ta kere cu su yiunan ta na Aruba y inicialmente el a pensa cu nan ta scondi den mondi, pero ora cu nan a haya Internet di e mucha muhe su telefon, mi a haya straño y a conclui cu nan no ta den mondi mas. Mester tin un hende ta yuda nan. Ta charge e telefon y hibe pa nan y cumpra carchi. E mucha muhe ta cu nan. E mucha muhe tabata keda cerca mi pa ocho dia caba pasobra e tabata rabia cu su mama.”
E dia di e sucedido e mucha muhe Edgarina a lanta welo di e fugitivonan pa 12.30 di madruga pasobra su ruman homber ta bin busk’e . Pero e persona en cuestiona resulta di no ta su ruman. El a bay y mainta tempran el a bolbe. “Mi a puntr’e bo a tende y el a contestami cu si. Pero el a bisa tambe cu e no sa di nada. El a keda henter dia na cas y a huur un auto. Anochi el a bisami pa wak pa e baby pero mi a nenga. El a bay y a bolbe un rato despues y a laga un mucha homber baha e baby. Mi no a wak ni e auto. Mi a manda un mensahe p’e y el a bolbe mainta, baña bisti y bay. El a laga e baby atras cu mi a yama e wela di e mucha pa bin buske.”
E ultimo mensahe di e mama na su dos yiunan fugitivo ta; Joander y Jorge, mami ta roga boso, porfabor entrega boso mes. Si nan mester gara boso e lo ta pio. Porfabor esaki ta un suplica. Mami ta stima boso hopi, mi ta preocupa, mi curason ta dolor. Entrega boso mes.”
