FTA tabata tin reunion cu Refineria di Aruba (RDA). Segun presidente di e sindicato, Hubert Dirksz, ta importante pa comparti e informacionnan aki cu esnan concerni. FTA mes ta representa e staff cu ta traha directamente bao di e refineria y nan mester sa unda nan ta para. Sigur pa comunidad, un reunion asina ta importante y sigur e expectativanan ta keda positivo, sperando cu na final e desaroyo cu tin, ta sali for di dje, keda cla cun’e y cu por haya toch un luz na horizonte.
Asina aki ta haya mas hende na trabao y den e caso aki cu e procesonan lo por continua, segun Dirksz.
E ta sigui splica cu no por papia di cierre di e refineria, pero sigur tin cu papia di e realidad. Aruba su situacion ta depende hopi di e situacion na Venezuela. Dirksz ta kere cu sigur si e situacion na Venezuela mehora, e lo contribui grandemente na e situacion di Aruba.
Expectativanan di RDA
Dirksz a remarca cu RDA ta un actor importante y sigur pa loke ta e proceso pa haya un bon resultado. Nan tin un rol hopi grandi den esaki. Nan tin tur capacidad y experiencia pa haci esaki y contribui pa tin un bon resultado. FTA ta spera sigur cu prome cu fin di aña tin un bon resultado.
Speransa
FTA ta spera cu e trahadonan por conta cu e sindicato ta representa nan bon. Nan ta haci tur nan esfuerso y lo trata pa haci esaki conhuntamente cu IOUWA, den e caso aki pa e trahadonan den nan totalidad pa nan por ta convenci cu tin un bon representacion y sigur cu ta lucha pa nan, pa trabao y tambe entrada.
E rol di gobierno
Un parti di e decision ta den man di gobierno. P’esey mes FTA ta reuni cu nan tambe, Hubert Dirksz ta bira por ultimo.
