FTA tabata tin un reunion cu gerencia di CITGO, cual abogado Hose Figaroa, vice presidente di FTA, a comenta cu nan a participa na dje despues cu nan a gana e referendum. E reunion a tuma luga na oficina di Mediador di Gobierno y entre otro ta pa haya poco splicacion riba e situacion actual pa e trahadonan cu FTA ta representa, cual ta trahadonan di staff.
Gerencia a bin y a duna poco informacion, cual ta informacion cu a wordo duna caba na e trahadonan mes, pero a splica FTA kico ta e situacion di e compania awor aki y aclarea un poco tambe. A purba di yega na algun palabracion preliminar.
A palabra cu e siman cu ta bin ta bin sinta hunto pa bolbe haya un update di con cos ta canando.
E reunion
Figaroa a splica cu desde a gana e referendum, no a sinta cu gerencia mes. Tabata manera un introduccion di FTA na Gerencia y na mes momento a papia un poco di loke cu den prensa ta wordo bisa riba e situacion di CITGO mes, pa loke ta e trahadonan, pago, placa, sancionnan cu tin poni door di Merca. A haya un splicacion di parti di CITGO con e situacion ta hinca den otro. Pesey a palabra tambe cu lo bolbe haya un update e siman cu ta bin riba con cosnan ta canando.
Con FTA ta wak’e
Loke tin awor aki ta informacion duna pa CITGO. Nan ta bisa cu e problema mas grandi den e caso aki, ta e situacion di e sancionnan cu tin na Merca. Merca tin cierto sancionnan riba PDVSA y ta doño di CITGO. E ora ey pa cierto transaccionnan tuma luga mester di excepcionnan cu tin cu wordo duna pa e gobierno Mericano. Tin biaha excepcionnan aki ta wordo duna, pero excepcionnan riba nan mes tambe ta suheto na interpretacion. Di kico exactamente e ta, cu eynan ta haya problema cu e banconan cu tin cu haci e transaccionnan aki cu tambe tin nan exigencianan, pa asina cubri nan mes. Ora cu tin tipo di sancionnan aki, cualkier instancia cu coopera cu un empresa di cual tin e sancionnan riba dje, por su mes hay’e den problema legal cu Merca.
Den e sentido eynan, e instancianan financiero envolvi den transaccionnan di placa, ta hopi cauteloso y di loke ta wordo splica, tin algun transaccionnan cu tin cu tuma luga, cu ta tardando un poco, como cu esakinan tin cu resolve, con leu e excepcionnan ta aplicabel si of no y si tin cu saca excepcionnan nobo pa eseynan por tuma luga, segun Figaroa.
Trankilidad
Pa awor aki nan no por a duna mucho cos concreto. Ta pesey a palabra tambe cu lo bin bek hunto e siman cu ta bin aki. Tin diferente cos pasando na e mesun momento pa purba di sigura esey. E intencion di loke tin di compronde si ta pa awor aki, operacionnan ta sigui na Aruba. E trahadonan en todo caso, pa awor aki ta den servicio di CITGO, pero loke si nan tin poco dificultad cun’e, ta e transaccionnan cu tin cu tuma luga. Pero e ta un situacion cu no por pronostica mucho bon kico ta pasa. Pesey a pidi tambe pa tin reunionnan mas frecuente pa asina por wordo informa cada biaha di kico nan ta logra y kico nan no ta logra na caminda, segun Hose Figaroa.
Garantia di trabao
Garantia di trabao tin den e sentido cu pa bo por termina e trahadonan, tin cierto procesonan legal cu tin cu cana. No ta asina si yega na un situacion cu no por garantisa trabao mas, no por yega di un dia pa otro y bisa e trahado cu trabao a caba. Tin cierto procesonan legal cu tin cu encamina, si esey ta e caso. Di nan parti, for di combersacion cu tabata tin ultimo, no a sinti cu esey ta algo cu ta wordo considera na e momentonan aki. A wordo bisa si cu tin diferente scenario, diferente plan cu nan ta trahando riba dje pa asina por enfrenta eventual situacionnan cu por presenta, pero pa awor aki nan no ta considerando bisa un lay off di personal completo, Figaroa a splica.
