Prome cu aña a cera, cosnan no mucho bunita a sosode pa loke ta e trahadonan di CITGO algun di nan miembro di sindicato FTA.
Tin carta a sali cu pa aparentemente dia 30 di januari, no lo tin mas entrada pa e trahadonan aki. Segun presidente di FTA, Hubert Dirksz, di berdad na fin di aña, a manda un carta na gerencia di CITGO, informando nan cu e trahadonan ta bay den un slow down action.
Ta haya cu di parti di gerencia, nan no ta cumpliendo cu e derecho cu e trahado tin pa informa nan kico lo bay pasa cu nan.
Desde principio a informa tanto Gobierno, RDA y na CITGO tambe, cu FTA mester por sa cuanto hende lo bay pasa over pa e operador nobo. Ora cu ta papia di e terminal y e waf, e operacionnan no por para.
Automaticamente esey mester sigui pa un operador nobo, den e caso aki. Door di esey, segun Dirksz, ta un informacion importante y obligatorio pa ley pa gerencia di CITGO informa e trahadonan.
Mientras cu dianan ta pasa, trahadonan no a firma, no a acepta e oferta. FTA a informa gerencia di CITGO esey tambe. Te awor aki, trahadonan ta den un slow down action.
Aparentemente ta sinti cu esey no tabata tin su efecto desea. Unico contesta cu por a haya di gerencia ta cu e informacion ey no lo por facilita FTA pasobra no a hay’e ni di Gobierno, ni di RDA.
E sindicato sa cu negociacionnan probablemente lo a termina entre Gobierno y CITGO y esey ta nifica cu lo mester firma e acuerdo final pa salida.
Papiando di esaki ta kere e ora cu e trahadonan ta na pia di trabao. Ta papiando aki di un grupo basta grandi. E top staff tambe a acerca nan abogado pa sali p’adilanti pa nan derechonan.
Awor aki tin tres grupo. Miembronan di IOWUA, Topstaff y miembronan di FTA, cual ta staff general.
Esey ta bisa cu e trahadonan ta lomba contra muraya den un incertidumbre y ta pensando cu ta parce cu ningun hende ta sali na nan derechonan. A bisa for di un principio cu tin cu papia cla, bay mesa, ta transparente, pa e ora busca un solucion.
E solucion ta cu si tin un grupo cu definitivamente mester pasa over, tin cu reconoce esaki. Por regla esey apart, segun e condicionnan cu ta posibel. Tin tambe e grupo cu tin cu bay, automaticamente si no ta necesario pa e continua cu su trabao na e momentonan aki.
E ora ey, pa esey, mester tin sumanan no menos cu loke a wordo paga den e acuerdonan anterior, tanto na momento cu Coastal a despidi di un cantidad di trahado y tambe Valero. Esey mes ta kere cu awor aki ta spera di Gobierno principalmente pa bin mesa y bisa kico ta bay pasa. Gobierno di su banda ta considera cu e ta laba man y e ta tira e problema den scochi di CITGO y CITGO en principio, si ta papia di e traspaso, CITGO, segun ley, traspaso no tin obligacion di paga e trahadonan nada.
Segun Dirksz, si ta cumbini entre e partidonan pa termina e relacion di trabao cu e trahadonan aki y pa cuminsa cu un grupo nobo nobo, sin añanan di servicio, sin beneficionan secundario, etc. e ora automaticamente esey lo ta bon pa e compania nobo.
Pero den e caso aki, legalmente e no ta posibel pa haci’e pa tur hende y di un otro banda, e sindicato no ta kere cu tin cu laga e grupo cu mester bay cas, bay cas cu e trato inhusto aki di ofrece nan e minimo di loke ley ta bisa.
Kico lo sosode dia 30
Lamentablemente sa cu maske cu ken tuma e operacion, pasobra un hende lo bay tuma over e operacion, no sa kende ainda, ta keda responsabel. Ta mira aki cu lo por bay tin casonan den corte, pero tambe ta sinti cu e trahadona ta wordo provoca, sindicatonan ta wordo provoca y esey lo por tin consecuencia di paro di trabao.
Esey ta un iresponsabilidad di parti di partidonan pasobra no tin e boluntad pa sinta na mesa. Di un otro banda, segun Dirksz, si esaki bay termina den corte, kisas lo ta cumbini e sindicato.
Si tin e boluntad y tur conoce otro y ta papia aki di grupo di trahadonan Arubiano cu ta tata y mamanan di famia, cu mester di un trato miho. Si yega e momento ya caba ta trahadonan ta bao di tension, pero si mas tempo pasa, e tension aki por desemboca den un protesta mas grandi.
Agenda
Dirksz a comenta cu nan a bin compronde di gerencia di CITGO, cu nan ta totalmente separa di CITGO madre, den e caso aki pa loke ta e negoshi. Solamente cierto cooperacion nan tin pa cierto trabaonan.
Por lo general, tur loke ta gastonan di e compania, ta keda separa di esun grandi. Den combersacion lo por sali afo den e sentido cu kisas por haya un contacto cu CITGO madre, cu por bisa e ora cu si nan contribucion pa yega na un solucion posibel, mester yega eynan.
Te awor aki, si no ta sinta na mesa, ta con por sali afo. E ora ta kere cu ta boluntad mester tin.
Salario
Awor aki ta CITGO Aruba ta e entidad pagando salario di e trahadonan. Tin un cooperacion eynan. Placanan cu tabata di PDVSA, e ta keda. E ora e placa ey ta wordo uza pa paga e trahadonan, naturalmente cu tin su limite.
Pesey tambe por evalua cu na cierto momento, e salarionan por sigui core mientras cu CITGO ta eynan. Tin un preocupacion cu si e traspaso ta bay pasa, kiermen e firmamento ta yega, fecha ta yega, cu CITGO ta simplemente bay, laga tur hende atras.
E ora ey esun cu tuma over tin cu tuma tur e encargo tambe, tur e gastonan cu tin di e trahadonan. Ley di traspaso ta proteha e trahadonan, segun Dirksz. Esun cu tuma over mester paga.
E ley ta bisa cu pa un aña largo, si esun cu tuma no por paga, CITGO ta keda responsabel pa paga. Tin cu wak’e mas profundo cu abogadonan. E idea ta pa sinta cu Gobierno y wak con por toch haya mas informacion y con pa sali afo.
E punto ta djis cumpli cu e trahadonan. Y pa por negosha, mester sa cuanto hende ta pasa over. Esey mester ta definitivo y e sindicato no por compronde dicon e posicion di RDA y Gobierno ta pa no atende cu esaki.
Gobierno y FTA
FTA no a haya ningun motibo pakico Gobierno no kier sinta cu FTA. A sinta si cu conseheronan. E ultimo reunion a informa e sindicato cu ta 10 trahado so ta pasa over y esey a cay den mal tera.
Ademas cu e no ta berdad, basa riba e seriedad ora di dialoga, FTA por yega mas leu. E ora ey por firma algo. Pero cu ta garantisa, den un forma serio, ta soluciona e problema aki pa e trahadonan. No por trata e trahadonan manera cu nan ta trata actualmente.
