E empleadonan di Corte na Aruba, pa algun tempo caba tin un sindicato cu ta conseha nan. Nan tabata inicialmente cu sindicato, pero na final di aña pasa a scoge pa cambia di sindicato.

A acerca FTA y awor aki tin un situacion poco fastioso, segun mr. Hose Figaroa, vice presidente di e sindicato y alabes consehero huridico di e organisacion, unda cu Corte a dicidi pa haci cambio na e reglanan cu ta vigente pa personal.

FTA: Empleadonan di Corte preocupa riba cambio cu ta afecta nan beneficionan

FTA: Empleadonan di Corte preocupa riba cambio cu ta afecta nan beneficionan. Click link pa mas https://24ora.news/2TuoYet

Posted by 24ora on Tuesday, January 14, 2020

Cierto di e cambionan no a cay mucho na agrado di e empleadonan. FTA a sinta den pasado cu representantenan di Gemeenschappelijk Hhof, na momento cu a bin cu e idea pa trece cambio.

Den e caso aki sindicato anterior, a trece e punto di e trahadonan dilanti, unda cu nan no ta di acuerdo cu varios di e cambionan cu nan ta considera como un retraso den nan beneficionan.

A keda pendiente di un reaccion di parti di Corte riba esaki. Pa sorpresa di FTA, e empleadonan a haya un notificacion cu entrante prome di januari a implementa un reglamento nobo sin a consulta bek cu e sindicato na Aruba over di puntonan cu a discuti ariba.

Ta menciona den e carta si cu a haci esey, sinembargo FTA, como sindicato nobo no a haya ningun informacion riba e tema. Tin di compronde cu for di e sindicato anterior, TOPA, tampoco no a ricibi ningun reaccion di parti di Corte.

Esey FTA ta considera un poco no etico di parti di Corte. FTA ta pendiente si pa un combersacion cu e trahadonan. Den e carta ta indica cu a tene cuenta cu hopi di e puntonan cu a trece dilanti.

Sinembargo ta recien e contenido di e reglamento nobo a keda comparti cu e trahadonan. Ta den e proceso pa wak kico en berdad ta para den e reglamento nobo y kico a keda cu no ta di acuerdo cun’e.

Unabes tin esey cla, lo ta tuma contacto bek cu Corte p’asina exigi toch pa bay bek na mesa, aunke legalmente e ta bay un poco diferente. Na Corte bo no tin un CAO, y bo no por tin un CAO tampoco, pasobra e trahadonan ta wordo tuma den servicio a base di un nombramento, no a base di un convenio laboral.

Sinembargo esey no ta nifica cu como bon dunado di trabao, tin cu tene na cuenta e interes di e empleadonan na momento cu ta haci ahuste na e reglanan cu ta vigente pa nan, sigur na momento cu bo ta haci ahuste y ta haci cambionan cu no ta den beneficio di e trahadonan aki.

Pronto Corte lo tende bek di sindicato FTA unda cu lo exigi pa bay bek na mesa di negociacion y bay papia atrobe riba cierto di e cambionan cu a implementa.

Oido

Logicamente e accion ta e ultimo cos cu bo kier pensa riba dje. Ta un tarea di sindicato pa defende e interes di e trahadonan y parti di esey por hiba cu na cierto momento si bo no ta haya reaccion, bo lo tin cu bay over na tuma medidanan mas drastico.

No ta na e punto ey ainda, pero no lo por descarta cu si oido no wordo duna na e exigencia of na e preocupacion di e trahadonan, cu e lo por yega na accion, Figaroa a splica.

E cambionan

Den pensamento di Corte, e cambionan aki ta cambio pa miho. Esey ta e interpretacion di un banda. Na momento cu kier implementa cambio, e exigencianan di actua como bon dunado di trabao ta, cu ta tene na cuenta e interes y opinion di esnan cu ta traha p’abo.

Esunnan cu e cambio lo tin efecto riba nan, ta di pensamento cu e cambionan aki no tur di nan ta cambionan cu ta den nan interes. Tin cambio cu nan ta bay atras, qua beneficio, y ta e cambionan ey ta loke cu kier adresa.

Comments

comments