Dianan 13 y 14 di november, FTA taniendo su ultimo congreso extraordinario pa e aña aki. Segun presidente di e sindicato, Hubert Dirksz segun statutonan, mester tene minimo dos congreso, di cual nan ta cumpliendo cun’e. Normalmente ta tene tres congreso y eynan ta nada mas duna cuenta na e shopstewardnan cu ta presenta.
Den e caso aki tabata tin mas of menos 90 shopsteward. Mester tin e mayoria pa e congreso continua, of cuminsa y asina eynan ta haya tur empresa of tur sector den e comunidad, unda cu tin miembro, ta haya tur splicacion kico e sindicato ta haci di periodo pa periodo.
Ta duna e relato financiero di aña 2017 e biaha aki y tambe ta duna presupuesto financiero pa 2020. Haciendo esaki ta mustra transpariencia y ta percura pa di nan banda, scucha e shopstewardnan y asina haya, coregi unda mester coregi, haci cambionan cu mester haci pa por tin un miho organisacion y representa e trahadonan, e miembronan, miho cu ta posibel.
Esey ta pasa riba e dos dianan aki.
Riba agenda, semper ta pone un topico. Segun Dirksz, awor aki tin dos pa tres topico cu ta hala hopi atencion. E prome ta situacion financiero di pais Aruba. Su impacto riba entre otro inflacion, poder di compra y tambe cost of doing business.
Tin e parti di situacion social y tambe tin e parti di e relacion cu Hulanda. Nan ta puntonan importante, segun Dirksz. A evalua pa atende e puntonan aki durante e congreso. Ta duna informacion di loke nan haya y asina discuti nan un rato.
Como tema principal no a pone mucho atencion, pasobra loke cu ta e situacion di FTA mes, a dedica full dos dia completo na esaki.
Tin mas preocupacion
Dirksz a sigui splica cu ta atende sector pa sector. Ta pasa di empresa pa empresa. Ta duna splicacion y ta atende den e caso aki cu por ehempel e problemanan cu ta haya, tanto pa situacion di e trahado mes. Tambe ta atende cu e CAOnan cu ta andando, of cu mester cuminsa of cu a termina. Tambe tin e parti di situacion legal.
Ora cu ta papia di parti di negociacion di contracto colectivo, FTA ta ripara cu den sector hotelero no tin problema. E ta bay mas duro si. E ta tarda un poco mas, pero sigur e sindicato ta yega na acuerdonan satisfactorio.
Sa cu sector comercio ta dificil y esey mester ta mas creativo ainda, mester realmente conhuntamente wak con ta sali afo. FTA ta kere, di parti di dunadonan di trabao tambe, mester ta hopi mas creativo y si tin mester pa atende esaki na nivel tripartite, ta cu gobierno. Ta yega un momento cu mester haci esaki.
Loke ta preocupa e sindicato no ta solamente e instabilidad den mercado laboral of situacion laboral, pero tambe ta loke ta e situacionnan caminda cu trahadonan ta cay demasiado bao di e poder di compra. Esey ta bira un problema cu solamente aumento di por ehempel salario minimo, no ta suficiente pa soluciona e problema. Aki tin cu atende e situacion cu mas dedicacion y asina sali afo.
Si bo tin un situacion social cu ta causa pa situacion financiero economico, bo ta hayabo cu a lo largo esaki ta bay impacta den bo producto turistico pa tanto criminalidad of productividad laboral, etc.
Mester traha hunto pa sali for di e situacionnan cu presenta.
Sector comercio tin reto. Sector hotelero no. Sector bancario tin cierto si, cierto no. Pa loke ta construccion, FTA ta comparti e cantidad di miembrecia. Tin otro sindicato ta tuma mas miembro y FTA menos. Pero e parti di refineria por ehempel, tambe FTA ta eyden, cu ta colgando. Tin un bista, pero no sa ki dia ta yega na unda e trahadonan ta desea di yega. Tur esaki tin atencion di FTA y lo trata nan den e dos dianan aki.
Situacion actual
Presidente di FTA a comenta cu durante e dos dianan aki ta analisa loke ta poder di compra. Unda cu tin contracto colectivo, no tin CAO, esey no ta mucho problema. Pero caminda cu ta drentando companianan nobo, of den situacionnan caminda cu companianan existente, manera sector casino cu tin varios aña cu ta tambalea, FTA ta kere cu mester evalua esaki bon. Si bo tin un cantidad di cupo di trabao den cualkier sector, na momento cu e situacion cuminsa bira dificil of tambalea, e mester haya atencion di tur tres partido. Den e caso aki dunado di trabao, gobierno y e sindicatonan envolvi.
Sa cu tin companianan cu tin situacion dificil, pero sa tambe cu companianan nobo sigur den sector comercio, bo ta cuminsa pa yega na soluciona problemanan di trahado, pero no necesariamente esaki ta bay ta un caminda facil.
Mester haci un analisis profundo, esta pais Aruba, pa loke ta e situacion caminda ciudadanonan cu sea ta biba di salario minimo of cu no tin trabao, of mester haci un of mas trabao pa dia, pa nan por sali afo fin di luna, pa nan por cumpli cu nan debernan. Den e caso aki, pa loke ta CAOnan por bisa cu esaki no ta e caso, pero si e presion pa bo negosha ta fuerte. Tanto di e dunado di trabao, cu ta resisti y e trahado cu ta exigi, segun Dirksz.
Kico tin cu tene cuenta cune ora di negosha
Tin tiramento di awa den biña ora di negosha. Mester tin creatividad, boluntad, transparencia, concientisacion, comunica hopi y presenta e situacion manera cu e ta. Tanto e trahado ta presenta su situacion y e dunado di trabao ta presenta su situacion manera cu e ta. Den e forma aki, cu boluntad y transparencia, por yega mas leu, segun presidente di FTA, Hubert Dirksz.
