E situacion cu a surgi cu e di dos ola di COVID-19 na Aruba despues di apertura di frontera, tin tur hende preocupa y pensando riba kico pa haci y cual ta e miho caminda pa cana. Pa e sindicato FTA loke ta sigur ta cu comercio no por bay soporta un di dos lockdown.
Aruba a hay’e confronta cu su prome caso di coronavirus dia 13 di maart y a pasa den un lockdown cu a paralisa economia local. Esaki no ta algo cu por surgi atrobe, pasobra mas compania lo bati bancarota. “Comercio lo no bay wanta un lockdown mas. E forsa laboral ta bay ta bou di hopi presion,” segun presidente di FTA Hubert Dirksz
Un di e problema cu comercio semper tabatin ta e leynan laboral existente cu ta hopi pisa y den situacion di crisis nan ta keda valido. Esaki ta haci cu no sin mas por finalisa un relacion di trabou, cu crisis of sin crisis.
Diabierna awo tin un reunion importante di Conseho di Minister di Reino riba continuacion di e ayudo den forma di prestamonan bentahoso pero tambe otro medidanan cu Hulanda kier impone. Nan di FTA ta kere cu e negociacion cu Hulanda mester continua. Mester haci mas estricto e control riba e aplicacion di protocolnan. Aruba mester trata pa haya placa otro caminda y no sigui depende 100% di Hulanda. Aruba cu tur e consehonan ricibi di di IMF y CFT Aruba mes sa kico haci. “Mester haya claridad pero mester negocia duro cu Hulanda.”
Un posibilidad cu FTA tambe ta mira ta pa baha e loonsubsidie y na mesun momento baha e orarionan di trabou tambe. Cu e subsidio di salario lo tin companianan cu por wanta mas tempo nan operacionnan habri cu otronan. Pero sin subsidio si no ta mira sobrevivencia pa mayoria di companianan. E filosofia di FTA ta cu semper mester evita di manda trahadonan cas.
Awe 3’or di atardi Gobierno tin otro cumbre cu gremionan comercial y sindicatal, pero por lo menos FTA no a haya invitacion pa esaki.
