FTA celebrando 55 aña di aniversario cu un programa extenso di actividad

Sindicato FTA ta celebrando 55 aña di existencia e aña aki. A lant’e dia 22 di Juli 1964 y na Juli proximo, nan lo cumpli nan aniversario.

Segun presidente di e sindicato, Hubert Dirksz, dia 22 di Juli ta un dia so, pero tambe nan tur aña nan tin dia di obrero.

Sindicato FTA ta celebra 55 aña

Posted by 24ora on Tuesday, February 12, 2019

E aña aki congreso a dicidi cu nan lo bay cuminsa cu celebracion di weganan popular. Un actividad hopi social y dibertido cu ta bon pa trece e miembronan hunto y esey ta e intencion.

Tin un wega di Mens Erger Je Niet cu lo cuminsa diaranson, dia 13 di Februari, na Centro di Bario Brazil y ta caba dia 12 di April, na Centro di Bario Brazil mes.

Lo bay tin un apertura hopi grandi, sperando cu tur compania cu tin miembro na FTA, cu nan por bin participa. Tin un lista di nomber caba. Pero esnan cu no a registra, por bin participa. E prome anochi lo bay tin ademas di defile, lo bay tin tambe dos wega, cu cuater team.

E wega di Mens Erger Je Niet ta masha gusta den comunidad. Sigur pa e miembronan, esaki lo conta hopi, pasobra no ta solamente momentonan dificil, di pleito, di lucha, di CAO, protesta cu gerencianan, cu hopi biaha e relacionnan no ta asina facil.

Awo ta momento pa bin hunto, pasobra 55 aña no ta cualkier cos. Lo bay tin mas actividad, entre otro caminata cu te awor aki tin pensa pa haci’e prome cu dia di obrero of kisas despues di dia di obrero.

Sa cu e weganan aki ta exigi hopi. Pesey mes ta aprecia cu di parti di e directiva y di e congreso, a haya hendenan interesa.

Un di nan ta sr. Roland Hoek, kende ta secretario di Sector Horeca, kende a tuma e responsabilidad riba su schoudernan pa organisa esaki, cu apoyo di directiva y henter e administracion di FTA y e shopsteward y delegadonan di e diferente sectornan, pa por logra haya un bon actividad, cu participacion di mas tanto hende posibel.