Federacion di Trahadonan di Aruba (FTA) a manda un informe pa su miembronan den cual ta splica con pa atende e situacion reinante unda hopi compania ta tuma medida pa stop operacion. E ta conseha tur hende pa wak bon kico ta poni den e Contractonan Colectivo pa situacionnan asina.
“Den e dianan tras di lomba pais Aruba a conoce diferente desaroyo cu ta laga nos tur cu hopi pregunta y inkietud. Como consecuencia di e yegada na nos isla di e prome casonan di COVID-19 (Corona-virus), Gobierno di Aruba a tuma diferente medida severo pa purba mitiga e propagacion di e virus den nos comunidad. Entre otro a para entrada di tur bishitante for di exterior entrante awe, 17 di maart 2020. Tambe a ordena cierre di tur localidad entrante 10’or di anochi.”
FTA ta splica cu resultado di e medidanan aki ta cu e economia, cu ta depende practicamente den su totalidad directamente of indirectamente riba turismo, ta wordo afecta fuertemente. Hopi ta empresanan cu a cuminsa anuncia cu lo mester adapta e condicionnan di trabao na e realidad nobo aki. Esaki logicamente tin e clase trahado den un preocupacion enorme.
“Nos di FTA desde prome cu e medidanan antes menciona a wordo tuma, ta den deliberacion constante cu Gobierno di Aruba y Gremio Comercial p’asina sigura cu e interesnan di nos miembrecia y e clase trahado en general ta wordo teni debidamente na cuenta. FTA tin participacion directo den diferente comision cualnan actualmente ta duna Gobierno conseho pa cu decisionnan cu tin cu wordo tuma den maneho di e crisis cu a presenta.”
E contractonan colectivo (CAO) cu FTA tin cu e gran mayoria di empresanan, principalmente esnan den sector HORECA, tin stipulacionnan cu ta regarda e derechonan di e trahadonan na momento cu un situacionnan presenta den cual cu e empresa no por funciona debidamente door di caida di economia. “Nos ta conseha tanto nos delegadonan como nos miembronan pa tuma bon nota di e stipulacionnan den nan CAO.”
FTA ta bisa cu tambe ta importante pa enfatisa cu e hecho cu Aruba su economia ta confronta retonan grandi, no ta significa cu e leynan laboral di nos pais por wordo poni un banda door di dunadonan di trabao. Ta comprendibel cu empresanan lo tin cu haci algun ahuste pa por supera e efectonan cu e cierre di entrada di bishitante na nos isla ta trece cun’e. Sinembargo cualkier cambio den condicionan laboral por wordo haci unicamente den consulta y cu consentimento di e trahado(nan) envolvi.
Leynan laboral di Aruba no ta permiti ningun dunado di trabao impone cambionan den condicionnan di trabao unilateralmente. Esaki sinembargo no kiermen cu e trahado no mester tin un grado di comprension pa e situacion y demostra cierto flexibilidad na momento cu propone ahustenan temporario. Na final di dia lo logra supera e retonan grandi nos dilanti unicamente por medio di esfuersonan mutuo.
FTA lo sigui monitorea tur desaroyo entorno e situacion delicado cu nos economia ta aden hopi di cerca y lo mantene un participacion activo como defensor di e derechonan di e clase trahado. Si presenta cualkier problema of inkietud na pia di trabao relaciona cu e tema aki, tuma contacto cu e delegado(nan) di FTA na bo empresa of cu Departamento di Keho, Disputa y Conflico di FTA (KDC) via nos number di telefon (584 5448) durante oranan di trabao (dialuna pa diabierna 8’or pa 5’or) of via medionan social of e-mail ([email protected]). “Na final di dia nos lo logra supera e retonan grandi nos dilanti unicamente por medio di esfuersonan mutuo.”
