Awe mainta a tuma luga e referendum pidi door di e empleadonan di Eagle Resort unda un total di 127 persona tabatin derecho di voto.
Abogado di sindicato FTA, Hose Figaroa, a splica cu di e total di trahadonancu derecho di voto, 63 so a presenta pa deposita nan voto. Figaroa a bisa di biaha cu nan tabata consciente for di prome instante cu lo mayoria lo no acudi pa deposita nan voto. Tur e 63-nan a vota na fabor di sindicato FTA, pero un di nan tabata invalido pa e forma cu el a yena e hokki.
E hecho cu no a haya mayoria di hende pa bin vota ta debi na intimidacionnan cu empleadonan a pasa aden. Asina nan a haya grabacionnan di esaki. Tambe gerencia a pone dos hende pafo pa sinta vigila kende ta esnan cu ta acudi pa deposita nan voto. Asina a haya informacion cu un persona na momento cu el a caba di sali pafo, el a haya un yamada pa inform’e pa no presenta mas na trabou pasobra el a vota pa sindicato.
Figaroa ta lamenta masha hopi loke empleadonan a pasa aden. E trahadonan mester a haya e chens husto pa deposita nan voto, si nan kier un sindicato of no. Y esaki no por tuma luga via un forma di intimidacion. Si tin prueba di esakinan, FTA lo haci un denuncia. E ta sigur cu por haya esaki, mirando e voicenotenan cu a scucha caba.
