Frisian Flag a celebra Dia Mundial di Lechi

Awe mainta a tuma luga celebracion di Dia Mundial di Lechi na Neptali Henriquez Park cuminsando for di 10:00am, cu “tasting” di lechi, combina cu hopi actividad pa mucha, cu a bay compaña cu premio y regalonan educativo. Cheryl Coronel, Unit Manager na Compra Ltd. ta mira atras riba un otro evento exitoso.

Compra Ltd. a enfatisa cu de facto e fecha mes a pasa caba, pasobra mundialmente ta celebra World Milk Day dia 1 di juni. Na mundo a cuminsa cu e celebracion aki desde aña 2001 pero na Aruba a cuminsa celebr’e desde aña 2013. E biaha aki ta di 6 aña cu Aruba ta celebra e dia aki, hunto cu Frisian Flag, e lechi mas conoci y mas bendi na Aruba.

Meta di e evento ta pa invita famia completo pa bin cu e muchanan, pa por educa nan con lecho ta yega Aruba, di unda e ta bin, beneficio di bebemento di lechi, energia, saludabel y tambe ta siña e muchanan con ta chica un baca. Nan a bin cu bacanan traha di palo y a duna les di chicamento.

Compra Ltd. a percura pa dos Dino Jump cu a tene e muchanan hungando henter mainta. “Bebiendo lechi, nan no ta cansa”, asina Cheryl Coronel a duna di conoce cu un sonrisa riba su cara.