Segun Minister Rudy Lampe, den combersacion cu tur stakeholder, a dicidi e ora definitivamente cu ta bay sali un destaho publico pa sloop e edificio di Frere Bonifacius. E estado cu e ta aden, realmente no tin otro alternativa.
Esey lo ta un alivio tambe pa e vecindario, pasobra el a bira un luga di adictonan ambulante cu tabata causando un situacion di falta di higiena pa henter e vecindario. Esey lo bay tuma luga proximamente. Despues lo bay lanta eynan e localnan nobo y e Colegio Frere Bonifacius lo bay bek na su luga anterior. Kiermen e cabesante di scol, full e team, nan ta contento cu nan lo por bay bek na e localidad cu nan a laga den Indianenweg mas cu 6 aña pasa y ta necesario pa e sosode awo den e aña escolar aki, pasobra e cantidad di alumnonan tabata bayendo atras, mientras cu e ta un bon scol. E ta na un localidad pa mas di seis aña caba cu no a wordo traha pa scol. E ta fundamental cu den e aña escolar aki pa Colegio Frere Bonifacius cuminsa opera bek na su luga di antes, pa asina ey por sigui crece atrobe.
Fondonan
A aloca fondonan pa loke ta presupuesto 2018 pa esaki. E sumanan ainda no por revela, pero a pone fondonan disponibel si pa haci esaki.
St. Aloysius
Tin novedad tambe pa St. Aloysiusschool. Tambe den combersacion cu e cabesante di scol y director di SKOA, e ta bay den e direccion cu pa e aña escolar nobo, nan lo muda bay na e VAD Gebouw, unda gobierno lo huur 12 lokaal. E ora eynan ta bay haya Frere Bonifacius eynan, Dependence di Maria College y exactamente e espacio necesario pa aloca st. Aloysius eynan. Durante un aña escolar, ta spera despues di un destaho publico, di por renoba e scol, pa despues di un aña, e otro aña escolar cu lo ta 2019/2020, nan lo por ta eynan bek na St. Aloysius. Pesey tambe a aloca fondonan pa e aña aki cu por cuminsa cu e trabaonan.
A aloca pa e dos prioridadnan aki, pasobra en berdad, ora cu Lampe a bira minister, el a haya su mes confronta cu e situacion di st. Aloysius como tambe un walkout di e maestronan di Frere Bonifacius, cu cu rason a bisa cu den seis aña nada no ta pasa, tabata dimas pa nan. Pesey a duna prioridad na e dos scolnan aki.
MAVO/HAVO na Noord
E intension pa tin un MAVO/HAVO na Noord ta riba mesa ainda, segun minister Lampe. Ta spera tambe cu pronto lo por anuncia cierto noticianan. Pero ainda e ta den preparacion.
